"Enpatia falta handia izan da, bera oso gaixo zegoen"
Justizia eskatu du Hondarribiko komunitate senegaldarrak, ehunka herritarren babesarekin. Larunbatean berriro manifestatuko dira.
Babacar Welle omendu dute Hondarribiko senegaldarrek. Senegaldarrak dira, baina baita ere hondarribitarrak. Hori nabarmendu nahi izan dute komunitateko kideek. Askok hamarkadak daramatzate herrian, bertan lanean, haien familiak bertan sortzen. Ehunka pertsona elkartu dira Hondarribiko kaleetan, Babacar gogoratzeko, eta haiek dioten moduan “justizia eskatzeko”.
Martxoak 8 plazan elkartu dira. Banaka banaka, senegaldar komunitateko kide gehienek mikrofonoa hartu dute. “Gezur asko esan dira hedabideetan. Informazioa kaleratu baino lehen, galdetu, bestela gezurretan ari zarete”, esan du neska batek. “Enpatia” falta izan dela esan du, “gaixo baten kontrako enpatia falta”.
“Ez gara atzerritarrak, herritarrak gara. Guk ere lagundu dugu Hondarribia eraikitzen, herriaren parte gara”. Amorruz beteta hitz egin dute kideek, amorruak eta tristurak nahastutako sentimenduek bultzatuta. “Ez dugu ulertzen nola gertatu den hau. Polizia gu babesteko dago. Zer egingo dute zerbait larriagoa gertatzen denean? Nola jokatuko dute?”.
Magiek 28 urte daramatza Hondarribin. Etorritako lehen senegaldarra izan zen. “Babacarrek ez zuen ongi egin. Ez zuen labainarekin atera behar, baina halere, hori ez zen bera hiltzeko arrazoi bat inolaz ere”. Nabarmendu dute ez dituztela inoiz borrokarik eduki, beti sentitu direla oso babestuak herrian, baina era berean, horrelako zerbaitek dena zikintzen duela.
“Familia guztia hil gara”
Justizia eskatu dute behin eta berriz, bai Martxoak 8 plazan baina baita ere ibiltzen hasterakoan. “Familia guztia hil zuten atzo, denak hilda gaude”, esan du Babacarren anaiak. Itsasargi kaleko biribilgunera hurbildu dira, eta bertan, belauniko jarriz, Babacarren alde errezatu dute.
Berriro ere Martxoak 8 plazan amaitu dute manifestazioa. “Gizarte moduan galdu dugu, dena gaizki egin dugu. Gaur txalo asko ditugu hemen, baina hau gauza krudela da, ez da polita. Justizia behar dugu, eta hori horrela izan behar da”. Ahotsik gabe daude senegaldarrak, baina herriaren babesa eskertzeko aukera izan dute. “Milesker Hondarribia”.
Larunbatean berriro manifestatuko dira, 17:00etan, Hondarribiko Udaltzaingotik abiatuta.
Hona hemen HITZAk gaur ateratako argazkiak:
