Balkoian bai, erabakietan ez
Alarde Parekideak San Juan plazan alderdi politiko eta erakundeek aldetik jaso duen harrera erabatekoa izan da. 30. aldiz, ordea, bi alarde atera dira.
Balkoia beteta. Hala zen Irungo udaletxe atariko agertoki nagusia 10:30ean Irungo Alarde Parekideari harrera egiteko. Udalean ordezkaritza duten alderdi politiko guztietako ordezkariak han ziren Cristina Laborda alkatea buru zela eta PSE-EEko, EAJko, EH Bilduko, Elkarrekin Podemoseko eta PPko kideez inguratuta; Gipuzkoako Batzar Nagusietan ordezkaritza duten kolore ia guztietako kideak ere han ziren, Eider Mendoza ahaldun nagusiarekin nahiz EH Bilduko, PSE-EEko, eta Ahal Duguko ordezkariekin. Emakundeko nahiz Arartekoko ordezkariak ere bai izan dira. Jende asko goian. Askoz gehiago behean, Alarde Parekidean.
Behin eta berriz azaldu dute Alarde Parekideko agintariek euren helburua dela alarde parekide eta publiko bakarra izatea. 30. urtez esaten ari dira gaur hori, desfilatzen. Aurretik ere, urtean zehar, aurreko 29 urteetan zehar, desio berbera azaldu dute. Azkenekoz, maiatzaren 29ko udalbatzarrean. Irundar denek elkarrekin eta parekidetasunean festen egin handienaz gozatzeko aukera izan dezaten. Gatazka buka dadin. Baina gaur balkoian azaldu den ustezko bateratasuna, ez da erabakietan gauzatzen. Harresia Irunen bertan dago, udal gobernuarena (PSE-EEk eta EAJk osatua) eta PPrena. Udalak behin eta berriz muzin egiten dio eskaera horri. Balkoian denak ziren; erabakietan ez.
Arrankada eta San Martzial kalea igo ondoren San Juan plazan Sartu da Alarde Parekide jendetsua, 2.400 kidekoa. Patxi Perez jenerala iritsi denean, txalo artean hartu dute. “Gora Irun, Gora San Martzial, gora alarde parekide eta munizipala!”, oihu egin die Perezek. “Emakumeak alardean”, esanez erantzun diote. Plaza osoa hartu, errebista egin, eta Bidasoa konpainiako banderadun Iker Monterori hiriko ikurra eman diote. Azkenekoz beteko du zeregin hori Monterok. Atxeroak, Danborrada, Banda, Zalditeria, Landetxa, Lapitze, Meaka, Bidasoa, San Migel, Olaberria, Ama Xantalen, Anaka, Santiago, Artilleria… Konpainia denak eta bestelako lagunarteek Irunen erdialdeko zabalgunea bere egin dute 30. aldiz. Harro.
Jarraian, San Juan plazako giroaren hainbat irudi eta bideoa. Goizean zehar erakundeetako eta alderdi politikoetako ordezkarien erreakzioak publikatuko ditu HITZAk. Erreakzioen segidan, Alarde Parekidearen irudi sorta zabala eta bideoa.
