'Henry MendEZ!', gaur 19:00etan San Juanen
Hiriko hainbat talde eta eragilek deialdi bateratua egin dute gaur (ostirala) arratsalderako. Irungo Udalari Henry Mendezen kontzertua bertan behera utz dezala eskatuko diote.
Irungo hainbat talde, eragile eta erakunde ados jarri dira Henry MendEZ! esateko. Hasiera batean musikari horrek bihar (hilak 27, larunbata) eman behar zuen kontzertuaren kontrakotasuna adierazteko hainbat eragilek iritzi publikoa egin dute. Horien guztien, eta beste askoren baturatik kontzertu hori ez dadila egin eskatzeko mobilizazio bateratu deialdia osatu da: gaur (hilak 26, ostirala) izango da, 19:00etan, San Juan plazan.
Deitzaileek adierazi dute Irungo jaiak “guztiontzako espazio herrikoi, seguru eta gozagarriak” direla: “Jaiak ez dira soilik aisialdirako uneak: herri gisa sustatu nahi ditugun balioen isla ere badira. Horregatik, ezin dugu onartu jarrera matxista eta ultra-eskuindarrekin lotutako artista bat gurean izatea, eta are gutxiago diru publikoz kontratatzea”.
Haien kezka argudiatzeko, hainbat datu eman dituzte deitzaileek. “Oholtza gainean rojoak gorroto dituela adierazi izan du Herny Mendezek, eta Santiago Abascal bezalako ultra-eskuineko erreferenteen alde egin du. Horrez gain, sexu-erasoagatik 8 urteko zigorra jaso duen Rafa Mir futbolariari babes-mezu publikoa bidali dio: ‘Animo crack!’. Horrelako jarrerak borrokatu egin behar ditugu: gorroto politikoa elikatzen dute eta indarkeria matxistaren aurrean erasotzaileekiko konplizitatea normalizatzen dute. Horregatik diogu Henry Mendez, eta haren ideiak, ez dela ongi etorria Irunen. Jarrera matxista, baztertzaile eta ultra-eskuindarrek ez dute lekurik gure jaietan, are gutxiago udalaren babesarekin eta diru publikoarekin antolatutako ekitaldi batean”.
Irungo abeslari horren kontrako salaketa ez dela isolatua esan dute hiriko eragileek. “Gogorarazi nahi dugu Madrilen bertan PSOEk PPren gobernuari eskatu ziola Vallecasen Henry Mendezek eman behar zuen kontzertua bertan behera uzteko, haren adierazpen publikoak onartezintzat jota. Irungo PSE-EEri bere alderdikideek egina baino ez diogu eskatzen, koherenteak izatea, alegia”.
Koherentzia eskatu diote udalari. “Udalak hanka sartu badu ere, garaiz da erabakia zuzentzeko. Horretarako modu bakarra erabakia hartzea da: Henry Mendezen kontzertua bertan behera utzi behar du, ahalik eta lasterren gainera. Bestelako erabaki oro ulergaitza litzateke. Kontzertua mantenduz gero, ulertuko dugu Irungo Udalak Henry Mendezen jarrerak babestu edo, gutxienez, normalizatu egiten dituela”.
