June Olazabalek eta Maria Jose Aldarondok merezitako aitortza jaso dute
Iragan larunbatean omenaldi bikoitza izan zen Hondarribiko Klub Nautikoak antolatutako bela estropadan. Munduko txapelketatik etorri berri den Olazabal eta urte luzez klubean aritutako 'Maiko' omendu zituzten hondarribiarrek.
Aldarondo eta Olazabal, larunbateko aitortza ekitaldian. Joan den larunbatean (hilak 23), Hondarribiko Klub Nautikoak antolatuta, Emakume-Gizon Itsasontzi Bela Estropada jokatu zen herrian. Lehia eta emaitzetatik harago, egun berezia izan zen bi hondarribiarrentzat. Batetik, Los Angelesetik heldu berri den eta han maila ederra eman duen June Olazabal izan zen eguneko protagonistetako bat. Munduko ILCA4 txapelketan urrezko taldean sartu eta 50. postuan sailkatu berri den hondarribiarrari omenaldi berezia egin zioten estropadaren ondoren. Bestetik, gaztearekin batera izan zen Maria Jose Aldarondo ‘Maiko’, hari ere omenaldia egin nahi izan zioten. Lore sorta bana jaso zuten biek.
‘Maiko’ 1990ko hamarkadan aritu zen Hondarribiko klubean, lehen emakume komodoroa izan zen. Ordutik kirol eta klub honen alde egindako guztia eskertu nahi izan zioten haren kide izandakoek eta gaur egun klubean aritzen direnek.
Lehiari dagokionez, Fernando Bustosek irabazi zuen kruzeroetan, eta haren atzetik Xabier Mendiguren eta Patxi Molina izan ziren. Estropadan, berriz, Iker Almandozek eraman zuen larunbatekoa, Eduvigis Narvarteren aurrretik. L Klasean, Juan Mari Odriozola izan zen azkarrena eta harne atzetik sailkatu ziren Joselu Aiestaran eta Ander Larramendi.
