Iraileko udalbatzan kritikotasunez agertu da EAJ
Udal tasen igoera kritikatu dute jeltzaleek, argudiatuz aurrekontuko zati bat oraindik ez dela gastatu. Zaldunbordaz eta Lurraldebuseko autobusen aldaketaz ere adierazi dira.
Iraileko udalbatzako balorazioa egin du EAJk. Hainbat kritika egin dituzte jeltzaleek Abotsanitzen eta udal gobernuaren aurka. Tasen igoera izan da nabarmenduenetakoa, EAJk dio eta 2027an udal tasak igoko direla, aurrekontuaren zati bat oraindik gauzatu ez denean. “Hondarribiko EAJ-PNVk iraileko osoko bilkuran herriaren interesen defentsan, baliabide publikoen kudeaketa arduratsuan eta erantzukizunean oinarritutako politika aldarrikatu zuen”, esan dute jeltzaleek.
Tasen igoera kritikatu zuten, baina era berean, egonaldi turistikoei ezarritako tasa begi onez ikusi dute EAJko politikariek. Udal gobernuarekin ere ados izan ziren jeltzaleak Damarri eta Mouriscot inguruko etxebizitzak babesteko akordioan, aho batez onartu baitzen mozioa. “EAJrentzat, ezinbestekoa da eskuragarri dauden aukera juridiko guztiak lantzea eta etxebizitza horien egoerak sortzen duen kezkari erantzutea”.
Egonaldi turistikoetara bueltan, alkateak udalbatzan adierazi zuen tasa berriak 700.000 eta milioi bat euroko etekinak eman ditzakeela, eta EAJk eskatu du diru hori ongi erabili beharrekoa dela. “Kaleen eta espazio publikoen garbiketan, mantentze lanetan eta udalerriaren zaintzan” inbertitu beharreko dirua dela uste dute. “Herritarrei zerga-ahalegin handiagoa eskatu aurretik, Udalak dituen baliabideak hobeto aprobetxatu eta diru-sarrerak arduraz kudeatu behar ditu”.
Zaldunborda eta autobusak
Zaldunbordaz ere mintzatu ziren. Jeltzaleek uste dute Abotsanitzek onartutako HAPO Hiri Antolamenduko Plan Orokorrekoko aldaketek segurtasun juridikoari buruzko zalantzak sor zitzaketela, eta horregatik “egoera honek hirigintza erabakiak berme juridiko guztiekin hartzearen garrantzia azpimarratzen” duela.
Azkenik, aste honetan izandako Lurraldebuseko aldaketak direla eta, EAJk adierazi du Donostia eta Hondarribia lotzen dituen E21 autobusak eta E25ak murrizketak jasatea albiste txarra dela, eta Mugikortasun Sailari hori aldatzeko eskaera babestuko zutela. “Jeltzaleek egungo maiztasunak mantentzearen garrantzia azpimarratu zuten, herritarrek”.
