"Babacar Welle tiroz hil zuen poliziaren jardunak ezin du zigorrik gabe geratu"
Senegaldarraren hilketaren harira, SOS Arrazakeria elkarteak komunikatua argitaratu du; poliziaren jarduna eta osasun mentaleko politikak zalantzan jarri dituzte.
Hondarribiarrak kalera atera ziren atzo arratsaldean Babacar Welle oroitzeko eta, batez ere, justizia eskatzeko. Dolua da nagusi astelehen arratsaldeaz geroztik herrian. SOS Arrazakeria elkarteak poliziaren jarduna eta osasun mentaleko politikak zalantzan jarri ditu, baita Babacarren senide eta lagunei elkartasuna helarazi ere. “Ez da onargarria, buruko osasun arazoengatik ezaguna den bizilagun batek ertzain eta udaltzainak aurrean zituela sortutako egoera konpontzeko, bere bizitzarekin amaitu behar izatea”, adierazi dute berriki argitaratutako komunikatuan. “Babacar Welle tiroz hil zuen poliziaren jarduna ezin du zigorrik gabe geratu”.
Era berean, erakundeei dei egin diete: “Erakundeek poliziaren jarduna babesten jarraituko al dute, ondorioak zeinahi direla ere?”. Horrek herritarren segurtasuna ezbaian jartzen du. SOS Arrazakeriak eskatu du heriotzari eman beharreko erantzun judiziala ez dadila lausotu, “ez haren heriotzaren erantzulea polizia izateagatik, ezta hildako pertsonaren ezaugarriengatik ere”. Osasun mentalaren arretan aldaketak eskatu dituzte, benetakoak eta sakonekoak.
Osasun mentala ere azpimarran jarri dute. Jakina da Babacarrek osasun mentaleko arazoak zituela, baina horrek ez du heriotza justifikatzen. Porrota da gehien aipatu duten hitza. “Arlo horretan lan egiten duten erakundeek behin eta berriz salatu dute egoera hori. Tristea eta tamalgarria da gabezia horiek agerian uzteko gizartearen arreta bereganatzen duten horrelako gertakari larriak behar izatea. Une honetan egiten ari diren hausnarketak, aurreko beste batzuetan bezala, denborarekin ahaztu eta ondoriorik gabe geratuko al dira? Ez al da garaia erakundeek egoera hori onartu eta hari aurre egiteko plan eraginkorrak martxan jartzeko?”, azaldu dute.
Bestalde, egunotan zabaltzen ari diren gorroto mezuak ere gaitzetsi dituzte. SOS Arrazakeriak ez ditu gorroto mezuak zabaltzen dituzten hedabideen politikak ulertzen. “Eta zer esan gertaera lazgarri hauek gorroto-mezuak zabaltzeko baliatzen dituztenei buruz, are gehiago mezu horiei oihartzuna emateko beren orrialdeak eskaintzen dituzten komunikabideak tartean direnean”.
