3,2 milioi kilo hegaluze atzaman dituzte oraingoz Hondarribiko barkuek
3.250.070,53 kilo hegaluze harrapatu dituzte denboraldia hasi denetik, erdia baino gehiago etxean salduz, eta kuota betetzea oso urrun duten arren, denboraldi ona dela diote askok.
Aines Agirrek ateratako argazkia, Txingudi ontziko bi arrantzaleri. Pixkanaka hegaluzearen denboraldia amaitzen doa. Jaietan egin zituzten azken deskargak etxean Hondarribiko arrantzaleek, eta orain Gijon aldean daude, bertan deskargatu baitute. Denboraldi ona dela diote askok, iaz baino gehiago arrantzatu dute eta, baina ezinezkoa ikusten dute kuota osoa betetzea, geroz eta ontzi gutxiago daudelako uretan. Udan zehar, hainbat portutan deskargatu dute arraina, baina hondarribitarrek behintzat, etxean gehiago deskargatu dute kanpoan baino.
Orotara, Done Pedro Itsas Gizonen Kofradiak adierazi duenez, 3.250.070,53 kilo hegaluze harrapatu dituzte denboraldia hasi denetik. Haietatik, 1.731.832,90 kilo etxean saldu dituzte, eta 1.518.237,63 kilo beste portuetan. Europako Batasunak Espainiari 2026an emandako hegaluze kuota 27.953.000 kilokoa da, eta beraz, horrek esan nahi du Hondarribiko barkuek kuotaren %11,5a harrapatu dutela oraingoz.
Abuztua bukaeran, Gipuzkoako Baxurako Arrantzako Ekoizleen Elkarteak adierazi zuen iaz baino %10,4 kilo gehiago jaso zirela iraila baino lehen. Hau da, 2026ko abuztua bukaeran 6.869.116 kilo harrapatu zituzten ontzi gipuzkoarrek, eta, 2025ean berriz, 650.000 kilo gutxiago. Elkarteak adierazi zuen hegaluzea oraindik ere Gipuzkoako arrantzaleen oinarri ekonomiko handiena dela, eta ezinbestekoa dela erritmo berdina urtez urte mantentzea.
Iaz, lau eurotan
Iaz urria amaieran bukatu zuten denboraldia, eta euskal ontziek 10.759.127 kilo atzaman zituzten. Bataz besteko prezioa 4 eurotan izan zuten. Aurten, kilo gehiago espero dira, eta ikusi beharra dago ze bataz besteko prezio izan duen hegaluzeak aurtengo denboraldian zehar.
