Ioseba Amunarriz: "33 urte hauetan eman dudan maitasuna bueltan etorriko zait"
Astelehenean jasoko du patroiak herriaren aitortza: Hiriko Urrezko Intsignia emango diote. 25 urte daramatza Ama Guadalupekoa gidatzen, eta kirolari emandako maitasun hori guztia bueltan jasoko duela azaldu du, pozik.
Ioseba Amunarriz. Nola jaso duzu aitorpena?
Ohore handiarekin jasoko dut intsignia hori. Ilusio handia egin zidan Igorren [Enparan] deiak. Uste dut aitortza honekin eman dudan maitasun hori bueltan etorriko dela niretzako. Hainbeste urte ibili eta gero klubean, 25 lehen taldean eta 33 klubean, une polit zein gogorretan, ederra da horrelako aitorpen bat jasotzea. Herriak maitasun hori itzuliko dit intsignia honekin.
Ez da klubak jasotzen duen lehen Urrezko Intsignia izango, gainera.
Hala da. 2005ean klubak jaso zuen, ederra izan zen hura ere. 2013an ere klubeko Juan Mari Bellok jaso zuen. Eta orain hirugarrena dator klubera. Ohore handia da guretzat.
Kontxako Bandera hemen da, baina baita herriko jaiak ere.
Arraunean hasten zarenean Kontxako Bandera dagoenean badakizu festarik ez dagoela. Gogorra da. Urte osoan zehar asko entrenatzen dugu Kontxa bezalako estropadetan lehiatzeko. Herria gozatzen ikusten dugu, trainerutik. Gurea hori da. Helburu nagusia lehiatzea da, ahalik eta gorenen egotea bi igandetan.
Eta irabaziz gero, orduan bai, festarako tartea izango duzuela. Kontxa eta herriko festak…
Biribila litzateke. Tokatu zaigu hori bizitzea. Bost alditan irabazi dut Kontxa eta bitan izan da irailaren 8an, egun handian. Ikaragarria izan zen. Egun horretan kolore berdeak elkartzen ditu herritar guztiak, eta haiekin batera ospatzeko aukera dugu. Izugarria da hura bizitzea.
Urte asko eman dituzu klubean. Zer eman dizu arraunak 33 urte hauetan?
Hondarribiarra izanik ederra da nire etxeko klubean bizitza oso bat ematea. Zorte handia izan dut. Garai oso onetan izan naiz, eta urte hauetan klubak eta herriak asko eman didate. Maitasuna bereziki. Eta jasotako maitasun horrek hemen jarraitzeko gogoak eman dizkit beti. Honaino horri guztiari esker iritsi naiz.
