Cristina Laborda alkatearen "demagogia" salatu du EAJk
Eskualdea kolapsatzen dituzten auto ilaren arazoa "ez dela udalerri honetan errepideak falta direla, baizik eta Frantziak muga itogune bihurtu duela" aipatu du taldeak.
Auto ilarak, Biriatuko ordainlekuan Udan bereziki Irunen ematen diren auto ilara handiei eta hauek eragindako arazoei irtenbide bat emateko asmotan, bilera izan zuten joan den astean Cristina Laborda alkateak Eusko Jaurlaritzarekin. Zenbait neurri adostu bazituzten ere, EAJ taldeak Labordaren “demagogia” kritikatu du eta honakoa gaineratu du: “arazoa ez dela udalerri honetan errepideak falta direla, baizik eta Frantziak muga itogune bihurtu duela”.
Eskualdea kolapsatzen dituzten auto ilaren arrazoi nagusia “Frantziako agintariek mugan eta Biriatu inguruan ezarritako murrizketaetan, errei itxieretan eta kontroletan “dagoela dio taldeak. Arrazoia ez dela Irunen errepideak falta direla diote, “hori demagogia” dela esan dute: “Arazoa da Frantziak muga itogune bihurtu duela, eta horren ondorioak Hegoaldeko nilaka herritar ari direla pairatzen”, esan du EAJko Diputatuen Kongresuko bozeramaile Maribel Vaquerok.
Gogorarazi duenez, 2,7 milioi ibilgailuk zeharkatuko dute muga uda honetan. “Egun hauetako auto ilarak errepide gehiago eraikita besterik gabe konponduko direla sinetsarazi nahi izatea arreta nahita desbideratzea da. Arduragabea da tamaina honetako mugaz gaindiko arazo bat sinplifikatzea, barne borroka politiko bihurtzeko”, esan du.
Mugaren edukiera murrizten duten erabakiak Frantzian hartzen direla erantsi dute, baina auto ilarak hemen pairatzen direla. “Eta Frantziak igarobideak ixten edo mugatzen dituenean, orain geratzen ari den bezala, Bidasoaldea Europako muga baten itxaron eremu bihurtzen da automatikoki”.
Egoera honek “esku hartze puntualetatik harago joatea eta erakundeen arteko lankidetzarako mekanismo egonkor bat ezartzea eskatzen” duela uste dute jeltzaleek: “Ezin gara hurrengo auto ilaren zain geratzera mugatu, eztabaida berari berriro hasieratik ekiteko. Badakigu noiz gertatzen diren joan-etorri handiak, badakigu zein diren puntu kritikoak, eta badakigu zer erabakik eragiten duten kolapsoa. Aurrea hartzea, koordinazioa eta Frantziarekin solaskidetza izateko gaitasuna behar dira”.
Espainiako Gobernuari “inplikazio handiagoa” eskatu dio EAJk, “bai Frantziako agintariekiko solaskidetzan, bai konponbide koordinatuak bilatzkeo orduan”. Bukatzeko, “arreta gutxiago desbideratu eta konponbideak emateko” eskatu dute: “Has gaitezen arazoari dagokion izenez deitzen: muga bat dugu, eta haren murrizketek Bidasoaldeko mugikortasuna eta Euskadik Europarekin duen lotura itotzen ari dira. Eta arazoa konpontzeko, haren jatorrian ere jardun behar da: mugaren beste aldean. Estatuko Gobernua ezin da ikusle hutsa izan”, erantsi du Vaquerok.
