Trafikoa arintzeko neurriak adostu dituzte udalak eta Eusko Jaurlaritzak
Bilera izan zuen atzo Labordak Jaurlaritzarekin. Lehen proposamen bati ezezkoa eman badiote ere, bigarren bati baiezkoa eman diola jakinarazi du alkateak. Bi kontrol jarriko dituzte Oiartzungo irteeretan.
Urgentziazko bilera izan zuen atzo Irungo alkate Cristina Labordak Eusko Jaurlaritzarekin, hirian joan den astean eman ziren eta datozen eguentararako aurreikusten diren trafiko arazoei irtenbide bat emateko asmoz. Alkatea eskaera zehatz batekin joan zen bilerara: Ertzaintzak Oiartzunen kontrolak jartzea, “sare nagusiko pilaketetan harraptuta geratzen diren gidariek ibilbide alternatiborik bila ez dezaten landabideetan edo bigarren mailako errepideetan barrena”.
Lehen eskaera honi ezezkoa eman badiote ere, bigarren bat adostea lortu dutela jakinarazi du udalak. Honen arabera, bi kontrol jarriko dituzte datozen egunetan. Lehena GI-2164 errepidean jarriko dute, Pikogarate bidearekiko bidegurutzean, gaztelu ingeleserantzko bidean. Honekin A-8ko ilarak saihetsi nahi dituzten autoek errepide hori erabiltzea lortu nahi dute.
Bestetik, bigarren kontrol puntu bat jarriko dute Gurutzeko biribilgunean. Barrakarako bidean. Autoek Olaberriara ez bideratzea nahi dute neurri honekin.
Horrela, trafikoa “Oiarzundik sarrera-puntu bakarrera bideratuko” dutela iragarri du udalak. “Proposamen bat entzutera joan naiz baina Jaurlaritzak ez du bakar bat ere ekarri. Bakardade instituzionalez betetako egunak izan dira, isiltasunezko egunak, ezezkoz betetakoa. Baina hemen irundarrak defendatzeko gaude, eta hori da egin duguna”, esan du.
