Laborda: "Ez dut ezezkorik onartuko"
Irunen ematen diren auto ilara eta trafiko arazoei irtenbide bat emateko asmoz, zenbait eskaera egin zizkion atzo Irungo alkateak Eusko Jaurlaritzari. Hauei uko egin diela salatu du.
Asteartean Cristina Laborda alkateak zenbait eskaera egin zizkion Eusko Jaurlaritzari, joan den astean jazotako auto ilara handiekin kezkati. Besteak beste, Oiartzungo sarbideetan kontrolak jartzeko eskatu zuen, “sare nagusiko pilaketetan harrapatuta geratzen diren gidariek ibilbide alternatiborik bila ez dezaten”, besteak beste. Bada, Irungo Udalak atzo jakinarazi zuenez, Jaurlaritzak “uko egin dio” kontrol horiek ezartzeari. Alkateak aipatu du ez duela ezezkorik onartuko, eta eskakizun argi batekin joango dela biharko bilerara: “Ez badute gure proposamena onartzen, beste aukera bat plazara dezatela, haien erantzukizuna baita”.
Alkateak erantsi du ezin dela “lehenengo mailako eta bigarren mailako herritarrik egon”. Onartzentzat jo du “jendea ospitalera ezin iristea, etxetik ezin irtetea edota etxera ezin bueltatzea ere”. Oiarrizko zerbitzuak direla erantsi du.
Trtafikoaren arloan dituen eskumenak bete ditzala eskatu dio alkateak Jaurlaritzari: “Gure aldetik eskua luzatzen eta udalaren baliabide guztiak eskaintzen jarraituko dugu, baina alderdi bakoitzak eskumenak bere gain hartu behar ditu. Bi gauza eskatzen dizkiot Eusko Jaurlaritzari: lidergoa hartzea, eta Irunen premiei erantzutea. Irundarrok ezin diogu kanpotik datorren arazo honi geure kabuz aurre egin. Irunek ez ditu aitzakiak behar, konponbideak baizik”.
