Auzozainak behar dira, bakardade ez hautatuari aurre egiten laguntzeko
AuzoEkin egitasmoaren barnean, Auzozainen figura ezinbestekoa da, eta udalak deialdia plazaratu du, boluntarioak bilatuz.
Iaz jarri zuen martxan Hondarribiko Udalak AuzoEkin egitasmoa martxan, bakardade ez hautatuan dauden pertsonei, adinekoei gehienbat, babesgune bat eskaintzeko helburuarekin. Martxoan kanpainaren balorazioa egin zuten, martxoko ekitaldiak aurkeztearekin batera. Bertan, martxan zeuden hainbat egitasmo azaldu zituzten, auzoz auzo antolatutakoak. Orain, Auzozain figurak behar dituzte, proiektua aurrera eramateko.
“Arkollan adibidez, kafe tertuliak jarri ditugu martxan, Ballestanea jatetxean hilabeteko bigarren astelehenetan, 16:30ean. Puntalan berdin, Goxo kafetegian hilabeteko bigarren astelehenean. Amuten, berdin, hilabeteko lehen asteartean, auzo elkartean, eta Mendelun, bi astean behin, goizeko 11:00tan”, azaldu zuen Oihana Sein AuzoEkin egitasmoaren teknikariak. Alde Zaharrean aldiz, adimena pizteko jarduera egiten dute, Kultur Etxeko 103. gelan, hilabeteko hirugarren asteazkenean, 16:30ean.
Egitasmo horiek denak burutzeko, Auzozain figura ezinbestekoa da. “Auzozain izateak eguneroko keinu txikietan oinarritutako laguntza-sare hurbil eta gizatiar baten parte izatea esan nahi du. Kafe bat partekatzea, paseo batean laguntzea edo jarduera komunitarioetan parte hartzea bezalako ekintzen bidez, helburua da loturak sortzea, bizikidetza indartzea eta inor bere auzoan bakarrik ez sentitzea”, azaldu du Hondarribiko Udalak.
Esperientziarik gabe
Naiara Franco Zabalduzeko teknikariak gogorarazi duenez, “baliteke pentsatzea laguntzeak ardura handiak eskatzen dituela, baina askotan nahikoa izaten da elkarrizketa bat, paseo bat edo norbaitekin kafe bat partekatzea. Keinu txiki horiek egunerokotasuna eraldatzeko gaitasuna dute”. Josu Peña zinegotziak ere gehitu du keinu txikiek aldaketa handiak egin ditzaketela, eta beharrezkoa dutela herritarren laguntza.
Azaldu dute ez dela beharrezkoa aurretik esperientzia edukitzea. Bi auzozain mota daude: pertsonala (bisitak egitea, paseoetan laguntzea, kafeak partekatzea edo adinekoekin denbora ematea) eta dinamizatzailea (auzoetako jarduera komunitarioak antolatzen eta dinamizatzen laguntzea). Auzozain izateko, udaletxeko web atarian edo Gizarte Zerbitzuetan eman daiteke izena..
