AuzoEkin proiektua, aurrera
Zabaltzen kooperatibako kideek burutu duten diagnostikoa aurkeztu eta hurrengo pausoen berri eman dute.
AuzoEkin bakardade ez hautatua eta hauskortasun sozialak 60 urtetik gorako pertsonen osasunean eta ongizatean duten eragin negatiboa prebenitzea eta arintzea helburu duen proiektua da. 2025ko otsailean aurkeztu zuen udalak, eta gaurkoan, Zabaltzen kooperatibako kideek burutu duten diagnostikoa aurkeztu eta hurrengo pausoen berri eman dute.
Amute auzoan izan da hitzordua, eta bertan izan dira Josu Peña Gizarte Kohesiorako zinegotzia, Zabaltzen kooperatibako kideak, Nagusilan elkartea, Emeki elkartea, Amuitz Dendarien elkartea eta Amute zein Mendeluko bizilagun elkarteetako ordezkariak.
Diagnostikoa osatzeko kooperatibako kideek 313 inkesta eta 27 elkarrizketa egin burutu zituzten. Inkestak webgunearen bidez edota hainbat guneetan jarritako kutxen bidez erantzun zitezkeen.
Datuak bildu ondoren hurrengo ondorioetara heldu dira: “Adibidez, bakardade ez hautatua errealitate bat dela eta eta estigmaren eta isiltasunaren erronka komunitarioa dugula ikusi dugu. Parte hartzearen eragin positiboa badago ere, bakardade egoeren lausotze bat ikusi da. Hori dela eta, hauskortasun egoerak detektatzeko zailtasunen aurrean sentsibilizazioa eta baliabide espezifikoen beharra daukagu” adierazi du Peña zinegotziak.
Auzoz auzoko lana
Hurrengo pausoa esku hartze zuzena izango da. Kooperatibako kideak, Gizarte Zerbitzuekin batera, arrisku ertainean dauden pertsonekin hasiko dira lanketa egiten. Lehen auzoak, Gibeleta, Mendelu, Amute-Kosta, Arkolla, Alde Zaharra eta Puntala izango dira.
Programan parte hartzeko, adineko pertsonek parte hartu nahi dutela adierazi beharko dute. Esku hartze horien bidez adineko pertsonen beharrak zeintzuk diren ikusi eta aktibazio komunitarioan eraginez behar horiei aurre egin nahi zaie.
Zabalduz Kooperatibako Laura Luque eta Zuriñe Villak azaldu dutenez, “bakardade ez hautatua udalerrian errealitate esanguratsu gisa hautematen den arren, zaintza familiaren ardura dela pentsatzen da eta horrek errealitate hauek isilpean bizitzea eragiten du, estigma sortuz eta gaia tabu bihurtuz. Hori dela eta, zaila egiten da komunitatearen aldetik erantzun bat ematea”. Zentzu horretan, herrian egiten diren jardueren garrantzia eman diete Luquek eta Villak, “jendea elkartzeko eta harremanak sendotzeko” gakoak direlako.
Azkenik, zinegotziak proiektuaren garrantzia nabarmendu nahi izan du: “Proiektu hau beharrezkoa da herri aktibazio komunitariotik abiatuz, herri zaintzaile izan eta bizilagunen arteko sareak sortzeko. Elkar zaintza bizilagunen artean egin dezakegun ekintza bat da, eta horren bidez elkarrekin hobeto egongo gara. Denok iritsiko gara zainduak izatera, eta ez dakigu momentu horretan gure egoera zein izango den eta ze behar izango ditugun”.
