"Udalok erantzukizun zuzena dugu indarkeria matxistaren aurkako borrokan"
Udalaren ustez, komunitateak sortzea beharrezkoa da indarkeria matxistaren aurka aritzeko, eta horrez gain, hainbat konpromiso hartu ditu, berdintasuna helburu.
Hondarribiko Udaleko lau alderdiek elkarrekin sinatu dute Indarkeria Matxistaren Aurkako Egunaren harira argitaratutako adierazpen instituzionala. Indarkeria matxista gaitzetsi dute komunikatuan, eta hortaz hausnartzeko momentua hartu dute. “Udalok erantzukizun zuzena dugu, komunitateak sustatzeko non auzotarrak, taldeak eta koadrilak indarkeria matxistaren aurrean erne egongo diren, eta indarkeria matxista pairatzen dutenak hartu, integratu eta babestuko duen bizitza komunitarioa bultzatzeko”, adierazi dute, ohar bidez.
Hondarribiko Udalaren ustez, gogora ekarri beharreko zerbait da indarkeria matxistak beldurrezko eta lotsazko ingurua sortzen duela, indarkeria jasaten dutenak bakartzeko eta isilarazteko joera duela, eta biktimagileen zigorgabetasun sentsazioa areagotzen duela. “Izan ere, egoera horiek areagotu egiten dira isolatuago egon daitezkeen emakumeen artean, besteak beste, adineko emakumeak, landa-ingurune sakabanatuetan daudenak, desgaitasuna duten emakumeak, emakume atzerritarrak eta bestelako baldintza bereizleak dituztenak”.
Komunitateen garrantzia
Indarkeria matxista ulertzeko, komunitateak ulertzea funtsezkoa da lau alderdientzat. Horrela deskribatu dute komunitatea: beste pertsona batzuekin konektatzen gaitu, eta babes loturak garatzea eta narratiba komunak sortzea ahalbidetzen du. Horregatik, adierazi dute komunitateak emakumeen aurkako indarkeria matxista prebenitzeko lagungarriak izan daitezkeela, “eta berdintasunean oinarritutako harreman inguruneak” sortzen dituztela, “diskriminazioaren eta indarkeriaren adierazpenek tokirik izan gabe”. Horregatik, haien ustez, auzokide, lagun edo kuadrillen arteko harreman estuak goiz ohartarazi dezake indarkeria egoera gertatzen ari dela.
Udalaren ustez, komunitate feministak beharrezkoak dira, hurbiltasunetik eta ahizpatasunetik indarkeria jasaten ari diren emakumeak gorputzez babes ditzakeelako, “baita enpatia adierazi eta gertuko bide laguntza eskaini ere”.
Bestalde, tokiko komunitateak “biktimen erreparazioa babes dezake”. Horretarako, egindako kaltea aitortu, eta indarkeria matxista salatu dezake, “eta publikoki biktimarekiko eta haren ingurukoekiko elkartasuna eta gaitzespena adierazi”.
Udalaren erantzukizuna
Udalaren ustez, haien erantzukizuna da emakumeen aurkako indarkeria matxistaren biktimentzako komunitate erreparatzaileak sustatzea. Horren harira, Hondarribiko Udalak hurrengo jarduerak garatzeko konpromisoa hartu du:
-
Indarkeria matxistei aurre egiteko prozesuan parte hartze duten udal barruko sailen koordinazioa landu, funtzio banaketa argia egin eta arreta protokoloa osatu. Egunerokoan protokoloa era egokian aplikatzen dela egiaztatu eta jarraipena eman.
-
Udal langileak indarkeria matxistaren zantzuak goiz detektatzeko gaitasunetan trebatzeko prestakuntzak antolatu
-
Sentsibilizazio- eta kontzientziazio kanpainak garatu, emakumeen aurkako indarkeria matxista hutsaltzen edo legitimatzen duten diskurtsoak eta jarrerak desaktibatzeko, bereziki konplizitate matxisten inguruetan.
-
Indarkeria matxistako kasuen aurrean herritarren mobilizazioa sustatu, indarkeria gaitzesteko eta biktimekiko elkartasuna adierazteko.
-
Tokiko emakumeen mugimenduei eta mugimendu feministari lagundu eta haiekin koordinatu, indarkeria matxistaren biktima diren emakumeak haien borrokan babesa emateko jarduerak garatzeko.
