Kabigorrik bi emanaldi berri aurkeztu ditu
Orils Pineda artista kubatarrak kontzertua eskainiko du eta Laura Sam poetak ahotsezko errezitaldia.
Kabigorrin izango da eztabaida, 19:30ean. Azaroko programazioaren berri eman du Kabigorri ateneoak. Hilabetero moduan, kultur eragile aktibo bezala jardungo du Kabigorrik, hainbateko kultur emanaldiak eskaintzen. Aurreko astean eman zioten hasiera Mirimeba Design ilustratzailearen erakusketari. Azaroaren 23ra arte egongo da ikusgai. Euskal Herriko txoko ezberdin ilustratu ditu, bere estiloan, hala nola Irun eta Hondarribikoak. Baina erakusketaz gain, badira bestelakoak.
Orlis Pinedak emango du hileko lehen kontzertua, azaroaren 8an, 19:30ean. Kantautore kubatarra da Pineda, egun Madrilgo Vallecas auzoan bizi dena. Muika kubatarren doinuak interpretatzen ditu, eta rumbarekin, sambarekin, flamenkoarekin edota hip hoparekin uztartu. 28 urte daramatza Pinedak Madrilen, eta ehunka kontzertu emandakoa da. hiriburuko hainbat gunetan kontzertuak eskainiz, hala nola Riviera aretoan, Amerikako Etxean, Kongresu Jauregian, Joy Eslava Aretoan, Arena Aretoan, Galileo Galilei Aretoan, Clamores Jazz aretoan, Café Libertad delakoan, San Isidro jaietan, PCEko jaietan, etab. Madrildik kanpo, Espainiako Estatuko erkidego guztietan aritu da, baita Berlinen, Parisen, Lisboan eta Txilen”, adierazi du Kabigorri ateneoak ohar bidez.
Hainbat artistekin kolaboratu du artista kubatarrak, hala nola Antonio Vegarekin, Eliade Ochoarekin, Los Chikos del Maiz bikotearekin, Luis Pastorrekin eta Carmen Parisekin. Bere abesti ezagunena Ponle corazon da. Abestia ereserki kubatar bat bilakatu da azken hamarkadetan, gerra kulturalaren haria jorratzen du eta.
Poesiaren txanda
Azaroaren 22an poesia entzungo da Kabigorrin 19:30ean. Laura Sam poetak emanaldi bat eskainiko du. Murtzian (Espainia) jaio zen, Laura Soto Sobejano izenpean, baina 2012. urtean Euskal Herrira mugitu zen, Bilbon Arte Ederrak ikastera, Euskal Herriko Unibertsitatean. Spoken Word poesia modalitatean aritzen da, eta Euskal Herrian huraren sustatzaileetako bat izan da. Horren adibide da Spoken World Bilbao Nazioarteko 1. Erakusketa, Gutun Zuriaren barnean aurkeztu zuena. Ibilbide luzea du Sotok mundu horretan.
Poesiaz musikara eraman du Sotok. Juan Escribanorekin La voz en contra diskoa kaleratu zuen, Oso Polita ekoiztetxearen eskutik. Horrez gain, hainbat single kaleratu ditu. Gainera, beste artista batzuen kontzertuetan oholtzan izan da Soto, Kase O rap abeslariarekin adibidez. Literaturan aritutakoa ere bada. Bi liburu argitaratu ditu: Incendiaria eta Geiser.
