Hiru egun 'Karmele' filmarekin gozatzeko
Ocine Mendibilen ikusteko aukera izango da Txintxua filmsen azken lana, gaur, bihar eta etzi.
Aurreko astean heldu zen Euskal Herriko zinematara Txintxua films-en Karmele filma, eta noski, Oarso-Bidasoan ere ikusteko aukera izango da. Gaurtik hasita, Oarso-Bidasoko hiru zinema edo aretotan izango da ikusgai.
Irunen gaur (hilak 17), bihar (hilak 18) eta etzi (hilak 19) proiektatuko dute, Ocine Mendibilen. Errenteria-Oreretako Niessen aretoan ere proiektatuko dute Asier Altunak zuzendutako filma, gaurtik hasita datorren ostegunera arte, hainbat ordutegitan. Oiartzuarrek ere etxetik gertu ikusteko aukera izango dute, datorren ostegunean (hilak 23, 19:30ean) botako baitute filma, Landetxen.
Sinopsia: “1937. Karmele eta haren familia Frantzian erbesteratzen dira, gerraren ondorioz etxetik kanporatuak izan ondoren. Han, Karmelek erbesteko euskal enbaxada kulturalaren proposamena jasotzen du, dantza eta musika ikuskizunen bitartez gerraren kontra borrokatzeko. Bertan, Txomin ezagutzen du, tronpeta jotzaile profesional bat, eta harekin maitemintzen da. Denboraldi batean Venezuelan bizi ondoren, bikotea etxera bueltatzen da, kendu zieten guztia berreskuratzeko esperantzarekin”.
