Bidasoko emakume ekoizleak omendu ditu Laborek
Laboreren ustez, emakumeak elikadura burujabetzaren zutabeak dira, baina oraindik ez dute merezitako aitorpena.
Atzo Elikaduraren Munduko Eguna izan zen. Gainera, herenegun, Landa Eremuko Emakumeen Nazioarteko Eguna. Labore Txingudi elkartetik uste dute bi data horiek elkar ospatzea ez dela kasualitatea, “elikadura sistemaren oinarrian emakumeen lana, jakintza eta zaintza daudelako, eta haien ahotsa eta eskubideak erdigunean jartzea ezinbestekoa delako justizia sozial eta ekologikoa lortzeko”.
Elkartearen ustez, landa eremuko emakumeak elikadura burujabetzaren zutabeak dira. “Haien lanari esker mantentzen dira tokiko ekoizpena, bioaniztasuna eta belaunaldien arteko jakintza”. Halere, Laboreren ustez, emakume askok oraindik ez dute behar duten aitortza, erabaki guneetan lekua ezta lan baldintza duinak ere.
Horregatik, Bidasoko emakume ekoizle guztiak omendu nahi izan zituen Laborek atzo.”Eguneroko lanarekin gure mahaiak elikatzen dituzte, tokiko ekonomiari bizitza ematen diote eta elikadura burujabetzaren aldeko komunitate bizi baten oinarria dira. Haien jakintza, ausardia eta elkartasuna dira gure eskualdeko agroekologia eta jasangarritasunaren bihotza”, adierazi du elkarteak ohar bidez. Elikadura sistema bidezkoagoa, jasangarriagoa eta feministagoa izateko, “beharrezkoa” da emakumeen rola aitortzea eta haien lidergoa indartzea.
Haiek gogoan, herritarrei dei egiten die Laborek, tokiko ekoizleei babesa emateko. “Kontsumo kontzientea sustatu eta elikadura bidezko, osasungarri eta solidario baten aldeko urratsak elkarrekin egin behar ditugu”.
Elikadura eta zaintza, uztarturik
Laborek argi du: “Elikadura ez da soilik merkatuaren edo kontsumoaren auzia: eskubidea da eta ondorioz, komunitatearen ardura”.
Laborek elikadura eta zaintza uztartzen dituen ikuspegi integrala proposatzen du, beti ere ekofeminismotik begiratuta. “Lurra, gorputzak eta komunitatea erdigunean jarriko dituen eredu baten alde egiten dugu”. Elkartearen ustez, ikuspegi integral hori gauzatzeko, tokiko ekoizpenaren eta kontsumo arduratsuaren aldeko sareak sendotzea eta emakume ekoizleen ahalduntzea funtsezkoa da.
