"Oraindik asko dago aldarrikatzeko"
Jende andana elkartu zen atzo Irungo kaleetan, xede berdinarekin: Palestinar estatuaren askatasuna eskatzea.
Herriak kaleak bete zituen atzo Hego Euskal Herrian. Eguerdian, hegoaldeko lau hiriburuetan bildu ziren lanuztea egin zuten langileak, baina arratsaldean, mila pertsona inguruk hainbat herritako plazak bete zituzten. Irunen ere, Irun Palestinarekin mugimenduak deituta, kaleak hartu zituzten.
19:00etan abiatu zen manifestazioa San Juan plazatik. Lehen ilarak palestinar komunitateak bideratuta, Kolon pasealekutik aurrera egin zuten. Azken urteetan, beharrak bultzaturik, hainbeste aldiz entzundako aldarriak entzun ziren, hala nola “Palestina, askatu!” eta “Ibaitik itsasora, Palestina aurrera!”. Aldarriak ez ezik, Israelekin harremanak dituzten enpresak seinalatu zituzten, haietan Israel boikot jartzen zuen pegatinak itsatsiz.
Asko eguerdian Donostian izandakoak ziren. “Greba eguna da, beraz, protesta eguna. Goizean Donostian, arratsaldean Irunen eta deialdia egongo balitz, gauean beste nonbaiten egongo ginateke”, azaldu du manifestari batek. San Migel auzoraino iritsi zen manifestazioa, eta bertan San Juan plazara itzuli ziren berriro ere.
Menia adostu arren, Israelek erailketekin aurrera jarraitzen du. “Oraindik asko dago aldarrikatzeko. Israelek erakutsi du ez duela borondaterik bakearen alde egiteko. Horrez gain, Palestinak haren lurrak lortu arte, kalera ateratzen jarraituko dugu askok”. Horregatik, Irun Palestinarekin egitasmoak bere lanean jarraituko du. Urriak 23an Palmera Monteron batzar ireki bat egingo dute, eta atzo, bertaratutako guztiei helarazi zieten deialdia.
