Urriaren 5ean izango da Txingudi Korrika lasterketa
10 kilometroko ibilbidea egingo dute korrikalariek. Bezperan, urriaren 4an, Txingudi Korrika Txiki egingo dute urte bat eta hamahiru urte artekoek.
Badago aurtengo Txingudi Korrika lasterketaren data: urriaren 5a, igandea. 10:00etan hasiko da proba, eta 10 kilometroko ibilbidea egingo dute Hendaiatik Hondarribira arte, Txingudiko badia osoa gurutzatuz. “Ikusgarritzat” jo dute ibilbidea antolatzaileek, eta internet bidez ikus daiteke osorik, irteera, helmuga, aparkalekuak, eta gainerako zerbitzu guztiak jasota dituen mapan.
Izena emateko epea zabaldik da jada, eta lehen 100 pertsonek hamahiru euroan eskuratuko dute dortsala. Ondoren, hilaren 31 aurretik izena ematen duten 300ek hamabost euroan eskuratuko dute; irailaren lehenetik 29ra artean, ordea, hemezortzi euroan. Azkenik, azken astean erosten dutenek 22 euro ordaindu beharko dituzte.
Dortsalarekin batera lasterketaren kamiseta eta hornidura jasoko dituzte. Horrez gain, 35. minututik 60.era arte lasterketako erritmo-erbiak egongo dira, baita ekipajea garraiatzeko zerbitzua ere; hala, lasterkariek motxila irteeran utzi eta helmugan berreskuratuko dute. Aldagela eta dutxa ere egongo dira.
Txingudi Korrika Txiki
Haurrek ere izango dute lasterketan parte hartzeko aukera, Txingudi Korrikaren bezperan, urriaren 4an, Txingudi Korrika Txiki egingo baitute. Urte bat eta hamahiru urte artean dituztenek parte har dezakete bertan, dohainik.
