Zestafestaren bigarren ekitaldia aurkeztu dute
Plazer bisualaz gozatzeko, hitzaldi interesgarriak entzuteko eta diseinuaren sektorean erreferente diren adituak ezagutzeko helburua du.
Goio Uriarte, Ane Garmendia, Patri Taberna, Julia Lasa, Maddi Carton eta Ortzi Alonso. Gaur goizean Zestafestaren bigarren ekitaldia aurkeztu dute. Martxoak 8 plazan izan da hitzordua, eta bertan bildu dira Ane Garmendia, Patri Taberna eta Julia Lasa antolatzaileak, Ortzi Alonso Kultura zinegotzia eta Goio Uriarte eta Maddi Carton Kultura teknikariak.
Aurreko urtean izandako arrakastaren ondoren, aurten bigarren edizioa antolatzeari ekin diote Garmendiak, Tabernak eta Lasak. Diseinuan eta sormenean oinarritutako jaialdia da, baina hori baino gehiago ere badela nabarmendu du Alonso zinegotziak. “Ekintzailetza, gaztetasuna eta emakumearen presentzia” potentziatzen dituen ekitaldia da Zestafesta, eta horregatik bereziki, udalak laguntza ematea garrantzitsua iruditu zitzaiela adierazi du.
Itsas Etxea Auditoriumak jasoko du hilaren 31n diseinu eta sormen festa. Goizean tailerrak egongo dira, arratsaldean hitzaldiak, eta ondoren, Topa! egingo dute, Kirol Kaiko Ostalaritza Elkartearekin antolatu duen Kai Potearekin bat eginez.
Zestafestaren helburuak iazko bera izaten jarraitzen duela azaldu du Julia Lasa ilustratzaileak: “Plazer bisualaz gozatzeko, hitzaldi interesgarriak entzuteko eta gure sektorean erreferente diren adituak aurrez aurre ezagutzeko ekitaldia da”.
Informazio gehiago hemen aurki daiteke.
Patri Taberna diseinatzaileak Hondarribiko Udalari eskerrak eman dizkio “eguna errealitate bihurtzeko” baliabideak eman izanagatik. Horrez gain, EIDE elkartearen, hau da, Euskadiko eta Nafarroako diseinatzaile industrialak, grafikoak, espazioetakoak, zerbitzuetakoak eta estrategikoak biltzen dituen elkarteak, laguntza dutela nabarmendu du. “Diseinu ekitaldi honi aitortza nazionala eman zaio”.
Tailerretako sarrerak agortuta dauden arren, hitzaldietan parte hartzeko sarrerak zestafesta.com-en eskuratu daitezke.
