Irungo bonbardaketak oroitzeko jardunaldi berezia egingo du Kepa Ordoki elkarteak
Aurten 86 urte beteko dira, Gernikarekin batera, Irun bonbardatu zutenetik. Gertaera hori ahanzturan gera ez dadin, oroimen jardunaldi bat egingo dute irailaren 1ean.
1936ko altxamendu faxistak sekulako eragina izan zuen Irunen ere bai. Irudian, herritarrak kalean, tropa frankistek hiria bonbardatu ostean. Aurten 86 urte beteko dira Gernikarekin (Bizkaia) batera Irun bonbardatu zutenetik. Urteurren honen harira, Gernikako batzordearekin batera oroimen jardunaldi berezi bat egingo dutela iragarri du Kepa Ordoki Memoria Historikoa Bidasoan elkarteak. Irailaren 1ean izango da, 18:00etatik aurrera, Palmera Montero Gunean. Bertan, Gernika zein Irungo bonbardaketei buruzko azalpenak emango dituzte, Gernika Batzordea. 1976tik kontakizun kaleidoskopioa eraikitzen dokumentala proiektatu aurretik.
Elkarteak Atlas de Bonbardeos en Euskadi izeneko ikerlana ekarri nahi izan du gogora. Honen arabera Behe Bidasoa ere bonbardatua izan zen, 34 eraso jasan zituen, gehienak erdigunean izan ziren. Eraso bortitzenak abuztuaren 26 eta 29 artean jasan zituen hiriak. Irailaren 4an su bonbak erabili zituzten faxistek.
Ordutik “gezurraren inposizioa” nagusitu dela salatu dute beste behin elkartekoek, Gernikarekin gertatu den bezalaxe. “Gernika eta Irunek amankomunean dute bonbardaketen ostean, gezurraren inposizioa”.
