Irundarren ekarpenekin osatu dute Santa Elena kaleko berrurbanizazio proiektua
Azken asteetan proiektua osa lezaketen ekarpen, iradokizun eta ideiak jaso ditu udalak eta dagoeneko bertako auzo elkarteekin partekatu ditu.
Maiatzean hasi zuen udalak Santa Elena kalea berrurbanizatzeko parte hartze prozesua. Proiektuaren lehen ildoak idatzi ostean, udalaren webgunean proiektuaren ildo nagusiak aurkeztu zituzten, eta azken asteetan proiektua osa lezaketen ekarpen, iradokizun eta ideiak jaso dituzte. Dagoeneko bertako auzo elkarteekin partekatu ditu udalak ekarpen horiek.
Orotara, 26 jakinarazpen eta 42 proposamen jaso ditu udalak. Guzti horiek identifikatu eta aztertu ditu jada.
Prozesuan proposatutako ekarpenak kontuan hartuta, zirkulazioari eta mugikortasunari dagokionez, abiadura murrizteko gailuak jarriko dituzte kalearen hasieran (kalearen amaieran bezalaxe), eta proposatutako bide trazadurari eutsiko diote, zuzen bat saihesteko zirkulazioa arintze aldera. Horrez gain, eremuko seinale bertikalak indartuko dituzte, bertan adieraziz 20 km/h dela gehienezko abiadura. Aparkalekuak ere berrantolatuko dituztela jakinarazi du udalak, “mugikortasun urriko pertsonek aparkatu dezaten, eta zamalanetarako eta motorrentzako tokia izateko”.
Kalearen antolamenduari eta diseinuari dagokionez, espaloia zabalduko dute, “irisgarritasuna eta segurtasuna hobetzeko” asmoz. Eta herritarren ekarpenei erantzunez, oinezkoentzako espaloiei eta ibilgailuentzako bideei akabera ezberdinak emango zaizkie, elkarrengandik bereizteko, eta kalean hainbat hiri altzari jarriko dituzte: paperontziak, oinezkoentzako espaloien eta ibilgailuen bidean arteko pilonak eta lore askaren bat. Hauekin batera, bi parterre txiki ere jarriko dituzte, tamaina txikiko landareak landatzeko.
Herritarren Partaidetzako ordezkari Monica Martinezek, prozesuan parte hartu duten herritarrei eskerrak emateaz gain, nabarmendu du “ohikoa dela horrelako proiektuak gauzatu aurretik, herritarrei entzutea ekarpenak jaso, aztertu eta ahal den neurrian proiektuetan sartzen saiatzeko”.
Proiektuaren xehetasun guztiak, albiste honetan kontsulta daitezke.
