Amiantoagatik hildako Celestino Tolosaren senideen borroka txalotu du EH Bilduk
Donostiako Lan Arloko Bigarren Epaitegiak senideei kalte ordaina ordaintzeko ebazpena plazaratu berri du. Hil zenetik hamar urtera frogatu zuten amiantoak hil zuela.
Otsanda Tolosa eta Kontxi Urbieta, sakelakoan Celestino Tolosaren argazkia, eurekin, dutela. Aste honetan ezagutu denez, Donostiako Lan Arloko Bigarren Epaitegiak Celestino Tolosa irundarraren familiari kalte ordaina ordaintzeko ebazpena plazaratu berri du. 2008an. urtean hil zen, amiantoa inhalatzearen ondorioz. Birika transplante bat egin zioten hil aurretik, eta Tolosak horiek gordetzeko eskaera egin zuen. 2018an, froga horiei esker, hil zenetik 10 urtera, amiantoak hil zuela frogatu dute.
Irungo EH Bilduk beste behin babes oso adierazi diete Tolosaren senideei, eta haien «borroka txalotu» nahi izan dute, azken albisteen harira. «Aukera baliatu nahi dugu, ordea, begirune eta justizia amiantoaren biktima guztientzat eskatzeko, ez baita bidezkoa urte luzeetako prozesu gogorrak aurrera eraman behar izatea justizia egin dadin», esan dute koalizio subiranistako kideek.
Gaur egun ere garai bateko kontaktuagatik gaixotu asko dagoela nabarmendu du EH Bilduk, «enpresa batzuen ezagutza eta konplizitatearekin» gainera. «Enpresa hauetako batzuk, gainera, euren burua zuritu nahian, hainbatetan, gaixotasunaren errua langileengan jarri dutelarik. Onartezina benetan», erantsi dute amorruz.
Osakidetzari jatorri profesionala duten gaitz eta gaixotasunen aurrean «jarrera aktiboa» izan dezala eskatu du taldeak. Era berean, Celestino Tolosa bezalako heriotza gehiago ez gertatzea espero dute, «azken finean, guztion osasuna bermatzea ezinbestekoa baita jendarte justuago bat eraiki ahal izateko».
