Ohorezko Txandak ez du banderarik ekarri Hondarribira
Ama Guadalupekoa gizonen ontziak bosgarren postua bete du Ondarroan, eta emakumeen artean, Orio izan da jaun eta jabe. Hondarribia B sailkapen orokorraren hirugarren lekuan dago.
Hondarribiako emakumeen ontzia etxeko uretan lehiatzen. 
Hondarribia Arraun Elkarteko hiru ontziak lehia bizian aritu dira asteburuan. Hondarribiko Banderaren ondoren, Eusko Label eta Euskotren ligetako ontziak XXXVI. Ondarroako Bandera Cikautxo Sari Nagusian lehiatu ziren atzo. Hondarribia B Zarautzen eta Donibane Lohitzunen aritu da asteburuan.
Eusko Label Ligari dagokionez, azken jardunaldian Ohorezko Txandan arraun egiteak ez zuen Ama Guadalupekoaren emaitza hobetzea lortu eta bosgarren sailkatu zen azkenean 20:38:30 markarekin. Zierbenak hasieratik erakutsi zuen bere nagusitasuna estropadan eta taldearen lehen bandera irabaztea lortu zuen. Go Fit Hondarribia sailkapen orokorraren bosgarren postuan kokatuta dago 84 punturekin, Bermeo Urdaibai lehen eskifaiatik hamahiru puntura.
Euskotren ligan, Oriok ez zuen tregoarik eman eta dagoeneko ligako irabazlea da. Hondarribiko ontziak ez zuen asmatu atzo arraunean, eta azkena sailkatu zen 11:37:83 denbora eginda. Datorren asteburuko Zarauzko estropaden ondotik kanporaketetan murgilduko dira Euskotren Ligakoak.
Hondarribia B ontzia bere aldetik, XI. Zarautz Arraun Elkartearen Ikurrina eta XXVIII. Donibane Lohizune Ziburuko Estropada bereganatzeko helburuarekin lehiatu da asteburuan. Bosgarren amaitu zuten berdeek Zarautzen (21:21:22), eta hirugarren Donibane-Lohitzunen (21:37:57), sailkapen orokorraren hirugarren postua lortuz.
