435 langabe gehiago daude Bidasoan
435 langabe gehiago daude Bidasoan martxoko datuekin alderatuz. Urtebetean, 1.004 pertsona gelditu dira lanik gabe orotara.
Lanbideren bulego bat. Bidasoak Birizik-ek, Lanbideren datuetan oinarrituta, apirileko langabeziaren datuen berri eman du: martxotik apirilaren azken egunera 435 langabe gehiago daude Behe Bidasoan, Irunen 381 gehiago, Hondarribian 54. Hala, Irunen orotara 4.207 pertsona daude lanik gabe (%14,5eko tasa), eta Hondarribian 716 (%8,9ko tasa). Gipuzkoan langabezia tasarik altuena duen eskualdea da Bidasoa, %13,19ko tasa orokorrarekin.
Datuak 2019ko apirilaren azken eguneko zenbatekoekin alderatuz gero, oso ezkorra da emaitza: urtebetean 839 langabe berri zenbatu dira Irunen, eta 165 Hondarribian. Iazko apirilaren bukaeran langabeen tasa %11,6koa zen Irunen (orain %14,5ekoa) eta %6,8koa Hondarribian (orain %8,9koa). 1.004 herritar gehiago daude Lanbiden izena emanda, beraz, iazko apirilaren azken egunetik joan den asteko ostegunera.
Gipuzkoako langabezia tasa berria %10,6koa da; Araba, Bizkai eta Gipuzkoakoa %12,9koa.
