Bilduk hamasei emendakin aurkeztu dizkio aurrekontu proposamenari
Besteak beste, alokairu sozialerako laguntzak, euskararen erabileraren gaineko diagnosi bat eta udalaren ondasunen inbentarioa egitea eskatuko du koalizioak asteazkenean, aurrekontuetako osoko bilkuran.
Hondarribiko Bilduren udal taldeak hamasei emendakin partzial egingo dizkio udal gobernuak egindako aurrekontu proposamenari. Asteazken goizean egingo dute aurrekontuen plenoa eta, batez ere, gizarte gaiak ukitzen dituzten eskakizunak aurkeztuko ditu bertan Bilduk, horien artean 500.000 euroko partida bat sortzea alokairu soziala bultzatzeko.
Gurasoengandik emantzipatzeko, zailtasunak, herriko alokairuen prezio altuak eta krisia aipatzen ditu Bilduk emendakin horretan: “Asko dira etxea galdu edo Hondarribian ordaintzen diren alokairuen prezioak ordaintzeko zailtasunak dituztenak. Guzti hori nola hala konpontzeko, behar-beharrezkoa ikusten dugu neurriren bat hartzea eta udalak badu hori bere gain hartzeko gaitasuna”.
Gai sozialekin jarraituz, Hondarribia Abian Planari lotutako eskakizun bat egingo dute, “EAJk 254.814 euro jarri duen lekuan guk 600.000 eskatzen ditugu”. Horrekin, “herriko langabetuen lan merkaturatzea ahalbidetuko duten jarduerak martxan jarri eta lehen sektorearen sustapenerako esfortzu berezia egitea” nahi dute, “Hondarribiko produktuen ekoizpena sustatu, bertako enplegua indartzen den bitartean”.
Euskarari dagokionez, erabilerari buruzko azterketa bat eskatuko du Bilduk: “Bereziki arduratzen gaitu azken urteetan gure herrian sumatzen dugun euskararen erabileraren beherakadak. Generazio berriek eskolan ikasi arren, erabilerak ez du gora egin”, eta zeintzuk neurri hartu behar diren erabakitzeko aurretik diagnosi bat egitea proposatzen du Bilduren udal taldeak.
Udalaren ondasunen inbentarioa ere eskatuko du koalizioak biharko osoko bilkuran: “E.H. Bilduk 2012ko otsailean eskaera aurkeztu zion Udalari legeak agintzen duen inbentarioa egiteko. Geroztik, urtero aurrekontuen eztabaidan eskatu izan dugu, baina inoiz ez dute egin”, argitu dute.
