Hondarribiak aulki mugikorreko liga irabazi du kadeteetan eta gazteetan
Hondarribia Arraun Elkarteak urrezko zazpi domina, zilarrezko 11 eta brontzezko beste hiru lortu zituen larunbatean Orion egin zen Gipuzkoako Aulki Mugikorreko Txapelketan. Lurraldeko ligako azken jardunaldia ere izan zen.
Hondarribia Arraun Elkarteak (HAE) urrezko zazpi domina, zilarrezko 11 eta brontzezko beste hiru lortu zituen larunbatean Orion egin zen Gipuzkoako Aulki Mugikorreko Txapelketan. Lurraldeko ligako azken jardunaldia ere izan zen.
Denboraldiko beste probetan bezala, azken jardunaldian ere domina gehien irabazi dituen taldea izan da HAE eta klubetik kadeteen mutilen zortzikoak, eta haurren mutil zein nesken laukoen garaipenak nabarmendu dituzte.
Ligako azken jardunaldia izan zen larunbatekoa. Aurreikusita zegoena baino liga motzagoa izan da, neguko denboraleengatik hainbat proba bertan behera geratu baitziren. Azken sailkapenean, Hondarribiak kadeteetan eta gazteetan irabazi du liga —beteranoetan ere baina ez dago banderarik jokoan—, eta bigarren postuan geratu da Haur eta Nagusien mailetan; haurretan Oriok irabazi du liga eta nagusietan Irungo Santiagotarrak taldeak.
Gazteak eta nagusiak Euskadiko Txapelketara
Asteburu honetan, Euskadiko Txapelketa egingo dute Legution (Araba), Gazte eta Senior mailetan. Hondarribia Arraun Elkartea bertan izango da eta ordezkaritza bidaliko du ere aulki mugikorreko denboraldiko azken hiru zitetara, hilaren 20tik 22ra Banyolasen (Lleida, Herrialde Katalanak) egingo den Gazte eta Helduen Espainiako Txapelketara, hilaren 29ko Haurren eta Kadeteen Euskadikora (Legution) eta maila horietako Sevillako Espainiako Txapelketara, uztailaren 4tik 6ra.
