Hasi da Amua, eta igandera arte beteko du herria musikaz
Seigarren edizioa da aurtengoa, eta inoiz baino luzeagoa egingo dute. Gaur, bideoklip lehiaketa egingo da, Euskal Herriko euskarazko bideoklip lehiaketa bakarra.
Atzo herritar askok jendetza ikusi zuten Itsas Etxea kanpoan. Amua Festibala hasi zen atzo, eta urtero moduan, interes handia sortzen du herrian. Fil laburren lehenengo emanaldia izan zuten atzo, eta ondoren, Radio 3ko El Sotano programa izan zen bertan, Javier Sun eta The Molotovs taldearen kontzertuarekin batera. Ederki hasi zuten festibala, musikari eta ikus entzunezkoei merezitako garrantzia emanez.
Aurten, gazteen txanda izan da, eta ikastetxeak gonbidatu dituzte Itsas Etxera, emanaldi berezi bat eskainiz. Baina gaur arratsaldean martxan izango dira, film laburren bigarren emanaldiarekin. Baina hori ez ezik, AMUA EITB Bideoklip Lehiaketa izango dute beste urte batez, Euskal Herriko euskarazko bideoklip lehiaketa bakarra.
Azkenik, El Combo Batanga taldearen kontzertuarekin amaituko dute gaurko eguna. “Egun entzuten diren musika generoen oinarria edo jatorria aldarrikatzeko modua da. Kubatar talde errefuxiatua da, orain bost urte sortu ziren eta Europako salsa-merenge talderik onena kontsideratzen dira”, esan zuen Ernesto Toledo antolatzaileak aurkezpenaren egunean.
Bihar goizetik irekiko dituzte ateak, binilo azokarekin. 11:00etan hasi eta 20:00etaraino iraungo du. Hori ez ezik, arratsaldean Hondarribia Hiria Musika Bandak bere emanaldia emango du, eta sari banaketak egingo dira. Azkenik, Elvis Presley eramango dute pantaila handira, EPiC: Elvis Presley in Concert dokumentala proiektatuko dute eta.
Azken txanpa
Igandean amaituko da, lau egunen ondoren. Aiora Renteria oholtzara igoko da, eta Joseina Etxeberriarekin batera mintzatuko da, Musikeroa programarako.
