Gorria eta beltza Real Unioneko kamisetara itzuli dira
Espainiako Kopako kanporaketarako kamiseta berezia atera du Real Unionek; 2008-2009 denboraldia gogoratuko dute lehenengo garaikurraren mendeurrenean.
Espainiako Kopako lehenengo kanporaketa oso berezia da. Real Unionek, aurten, badu zer ospatu. Jokalarientzat oso partida berezia izango da Portugaleteren aurkakoa, baita zaleentzat ere. Talde txuri-beltzak kamiseta berria izango du soinean partida horretan, atzera buelta bat izango da. 2008-2009 denboraldiko kamiseta berriro ere jantziko dute. Kamiseta txuri-beltza beltza eta gorriarengatik ordezkatuko dute. Oroitzapen oso onak izan zituzten zale irundarrek kamiseta horrekin.
2008-2009 denboraldia oso berezia izan zen. Espainiako Kopako final hamaseiretan Real Madrid kanpoan utzi zuen talde irundarrak. Santiago Bernabeuko partida kamiseta beltza eta gorriarekin jokatu zuten, eta partida hura gogoratzeko diseinatu dute. Gainera, 1927an lortutako Errege Koparen mendeurrena izango da datorren urtean, eta irabazitako bi kopak azalduko dira kamisetaren bizkarraldean.
Edizio mugatua izan da, 200 guztira. Asteazkenean salmentan jarri zituzten, eta jendearen erantzuna oso ona izan zela esan du klubak.
Portugaleteren aurkako partida atzo jokatzekoa zen La Florida futbol zelaian, baina Toledon (Espainia) izandako tren istripuaren ondorioz, atzoko Espainiako Kopako jardunaldia bertan behera utzi zuten. Partida datorren asteazkenera, azaroak 4, atzeratu egin dute. 19:00etan hasiko da partida. Portugalete kanporatzea lortzen badu lehenengo mailako talde baten aurka jokatuko du Stadium Galen.
