Garoa Lekuona izango da EH Bilduren alkategaia
Berriro ere errepikatuko du koalizio subiranistaren lehen moduan. Azken lau urteetan alkateorde eta zinegotzi moduan jardun du.
Garoa Lekuonak errepikatuko du EH Bilduko aurpegi bezala 2027ko udal hauteskundeetan. Azken lau urteetan alkateorde moduan aritu da, eta era berean Euskara eta Ingurumen zinegotzi bezala. Hondarribiko EH Bilduren mahai politikoak Garoa Lekuona proposatu du, 2023an egin zuen moduan.
EH Bilduk Lekuonak azken urteetan egindako edo sustatutako erabaki batzuk nabarmendu ditu, hautagaia balioan jartzeko. Hala nola, Plan Orokorrean ezarritako Zubietako Parke Teknologikoa lehen sektorean oinarritutako gunea izatea, edota Tudelenea-Botika gunea etxebizitzak eraikitzeko lehen eremu izatetik azken gune izatera pasatzea.
Etxebizitzaren arloan ere, politika publikoak burutzerako garaian eraikita dauden etxebizitzetan begirada jartzea nabarmendu du ezker abertzaleko koalizioak. Inor erroldatu gabe dauden etxebizitzetan %100eko enkargua aplikatzea ere bada Lekuonak sustatutako ideia. Azkenik, euskararekin egindako lanketa sakona aipatu du EH Bilduk. Herriko eragile ezberdinak saretzeko ahaleginetan aritu da Euskara saila azken lau urteetan, hala nola euskara mahaiaren bitartez, eta parte hartze anitza lortuz.
“Oso ongi ezagutzen du Lekuonak herria eta lan handia egiten ari da bertako eragileekin. Eta hori ezinbestekoa da EH Bilduren proiektua gauzatzeko”. Herritarren behar eta kezkei erantzuteko proiektua daEH Bildurena haiek diotenez, “gipuzkoarren gehiengoak adierazten duen gisan”. Horregatik, koalizio subiranistak uste du urteotan erakutsi duen konpromisoagatik Hondarribian “hori gidatzeko pertsona egokiena Lekuona da”.
