1936ko gerraren biktimak ahaztu ez daitezen
44 hondarribiar identifikatu eta omendu ditu Hondarribiko Udalak, haien senideen bitartez. Atzo egin zuten ekitaldia, udaletxeko areto nagusian.
44 pertsona omendu zituzten atzo, 44 biktima. 1936 eta 1944 bitartean gerraren ondorioz hildako hondarribiarrak izan ziren protagonistak atzo, udaletxeko areto nagusian. Ekitaldi motza baina sakona, udalbatzak bideratutakoa, eta senideei zuzendutakoa. 44 horietako 15 biktimen senideak bertaratu ziren, eta udalaren aldetik oroigarri bat jaso zuten. “Memoria egitea ez da iraganari soilik begiratzea. Gaur egungo gizartea eraikitzeko moduarekin ere badu zerikusia, eta, batez ere, biktimen duintasuna aitortzearekin”, esan zuen Ortzi Alonso Kultur zinegotziak 1936ko gerraren 90. urteurrenean egindako programazioa aurkezterakoan.
Alonsok bideratu zuen arratsaldeko ekitaldia. Gerrak eragindako biktimak oroitarazi zituen Alonsok, eta argi utzi zuen Hondarribiko Udalak memoriaren aldeko konpromisoa irmo mantentzen duela. Ildo berdinetik jorratu zuen Igor Enparan alkateak bere hitzartzea, eskerrak emanez senide guztiei, eta memoriak Hondarribian duen garrantzia nabarmenduz.
Pedro Barruso, Jose Ramon Enparan, Koldo Ortega eta Aitzol Arroyo historialariek lan sakona egin dute Hondarribiaren eta 1936ko gerraren arteko harremana ikertzen. Barrusok hartu zuen hitza atzo, bere kideez gogoratu zen, eta berriro ere, memoria historikoaren garrantziaz gogoratu zen.
Hona hemen HITZAk atzo ateratako argazkiak:
