Iruña-Veleia hobe ezagutzeko aukera
Josetxo Mendiak hitzaldi bat emango du aztarnategi erromatarri buruz, ostegunean, Kultur Etxean, Blaganen ekimenez. 19:00etan izango da.
Iruña Veleia aztarnategia hobe ezagutzeko aukera izango dute hondarribiarrek ostegunean. Josetxo Mendiak hitzaldi bat emango du, Blagan euskara elkartearen eskutik, 19:00etan, Kultur Etxean. Aztarnategi erromatarraren inguruko xehetasunak azalduko ditu Mendiak.
Josetxo Mendia lanbidez nekazari ekologikoa da, Zegamako Altzibar baserrikoa, baina ezaguna da batez ere Iruña-Veleia Martxan elkarteko kide gisa egindako dibulgazio eta aktibismo lanagatik. Arabako Iruña-Veleia aztarnategiaren defentsan dihardu, eta grafitoen auzia argitzearen aldeko hitzaldiak zein bisita gidatuak eskaintzen ditu.
“120 hektareako hiri bat zen I. eta II. mendeetan, 10.000 bat biztanlekoa. Penintsula iparreko hirugarren jendetsuena. III. eta IV. mendeetan gainbehera etorri zen, eta hamaika hektareatara txikitu. Ibilbide historiaz eta orduko egoera sozioekonomikoez ere jardungo dugu”, azaldu zuen Mendiak, Iruña-Veleiari buruz, Goiena hedabidean.
