203 ikasle daude udal euskaltegian, azken 8 urteetako zifra onena
A1 mailatik C2 mailaraino banatzen dira ikasleak, eta goizez eta arratsaldez ematen dira klaseak. Gabonak pasata berriro irekiko da izen ematea.
Zenbaki ederretan dabil Hondarribiko Udal Euskaltegia. 2018-2019 ikasturtetik izandako matrikulazio onena erregistratu dute aurtengo kurtsoan: 203 ikasle. “Datu honek agerian uzten du hondarribiarrek euskara ikasteko, hizkuntza gaitasuna hobetzeko eta euskararen erabileran aurrera egiteko duten interesa”, adierazi du Garoa Lekuona Euskara zinegotziak.
Ikasturtea hasi da, baina horrek ez du esan nahi zifra gehitu ezin ez denik. Gabonen ostean, berriro irekiko da izena emateko epea.
15 talde osatu dira A1 mailatik C1 mailaraino, guztira 164 ikaslerekin. Goizez eta arratsaldez ematen dituzte klaseak, udalaren ustez aurrez aurreko irakaskuntza baita “eskaintzaren ardatza”. Goizez eta arratsaldez eskaintza emateak abantailak ditu, Lekuonaren ustez herritarren ordutegi ezberdinetara moldatzen dira eta klaseetako orduak.
Baina aurten ere autoikaskuntza ezarri dute zerbitzuan, eta C1 eta C2 mailetako 39 lagunek eman dute izena bertan. Autoikaskuntzak erritmo pertsonalizatua ematen dio ikasle bakoitzari, bere mailara eta beharretara moldatuz. Horrez gain, tutoretzak eta banakako saioak egiten dira jarraikortasunez.
Ikasleen ekimenez
“Ostiraletako mintza-praktika ere indartu egin da. Izen-emate kopuru handiari esker, bi azpitalde osatu dira: bata, maila apalagoa dutenentzat, eta bestea, maila aurreratuagoa dutenentzat. Horrela, parte-hartzaileek beren gaitasunera egokitutako giroan landu ahal izango dute ahozko adierazpena, eta euskaraz aritzeko segurtasuna eta erraztasuna irabazi”, adierazi du Hondarribiko Udalak.
