Berdinketa garrantzitsua Zarautzen
Denboraldiko hirugarren jardunaldian 0-0 izan ziren Zarautz eta Hondarribia. Berdeentzat, emaitza garrantzitsua, aurten 3. RFEF-etik jaitsitako taldearen aurka.
Larunbateko partida. IORITZ ERREZOLA Hondarribia Futbol Elkarteko gizonezkoen lehen taldeak oraindik ez daki zer den maila berrian galtzea. Hiru partidu jokatu dituzte oraingoz, eta bi garaipen lortu ondoren, denboraldiko lehen berdinketa izan zuten larunbatean. Zarautzen aurka jolastu zuten, arerio gogorra, aurten 3. RFEF mailatik jaitsitakoa. Baina berdezkoak ez ziren txikiak egin, eta Zarautzen jokatu arren, porteria hutsean utzi zuten.
Lehenengo minutuetan ederki hasi zen Hondarribia, planteatu nahi zuten partida zelai gainean jarriz. “Hasieran izan genituen momentu horiek, baina ondore partidua, orokorrean, motela izan zen”, azaldu du Ion Arza taldeko bigarren entrenatzaileak. Zarauztarrak izan zituzten haien momentuak, erakutsiz maila altuko kategoriatik datozela, baina halere, ez zuten lortu etenaldira gutxienez gol batekin iristea.
Bigarren zatia berdin joan zen. “Lehia taktikoa izan genuen zelaian. Ez ziren aukera garbirik izan”, esan du Arzak. Jabetzarik gabeko baloi ugariko partida izan zen, berdindua, eta zalearentzat ez oso dibertigarria. Partiduko azken momentuan, baloi geldi baten jokaldian, Zarautzeko atezainak akats handia egin zuen baloiaren bila ateratzerakoan, eguzkiak oztopatuta, baina Hondarribiko aurrelariak ez zuen jakin aukera aprobetxatzen, honek ere eguzkia oztopo zuelarik.
Aurrean, Orio
Asteburu honetan etxean jokatuko du Hondarribia FE taldeak. Oriokoren aurka izango dute partidua. Oraingoz, hirugarren sailkatzen dira hondarribiarrak, eta zazpigarren oriotarrak. Orioko taldeak ere ez du oraindik galdu, garaipen bat eta bi berdindu ditu eta gainean.
