Ezin hobe hasi dute denboraldia maila berrian
Ohorezko Erregional Mailan da Hondarribia Futbol Elkarteko gizonezkoen lehen taldea. 5-2 irabazi zuten igandean, eta bihar, Eibarren jokatuko dute.
Hondarribia FEren Instagrametik ateratako argazkia. Hondarribia Futbol Elkarteko gizonezkoen lehenengo taldeak ederki hasi du denboraldi berria. Igandean, 5-2 irabazi zioten Urola talde zumarragarrari, eta aurreko urteko ibilbide berbera jarraitu nahi dute aurten. Gazte berriak sartu dira taldean, harrobitik indartsu datozenak, eta Ohorezko Erregional Mailan dena eman nahi dutenak.
Etxean hasi zuten denboraldia, Ondartza futbol zelaian. Lehenengo gola Goierriko taldeak sartu arren, eta etenaldian 0-1 galtzen joan arren, bigarren zati hasieran hiru gol sartu zituen berdezko taldeak. Kerejetak sartu zuen lehena, Cabok bigarrena eta Michelek hirugarrena. Ondoren, Urolak beste bat sartu zuen, 3-2 jarriz markagailua, baina azkenean, Vazquezek beste bi sartu zituen 81 eta 87 minutuetan.
Ederki hasi dute liga, baina bide berberean jarraitzeko, bihar irabazi beharko dute, Eibarren, Urki taldearen aurka. Hurrengo partida ere kanpoan jokatuko dute, eta laugarren jardunaldian itzuliko dira Ondartza futbol zelaia, Orioko taldearen aurka.
