Lanean Mugaz Gaindiko Enplegu Azokaren edizio berria egingo dute urriaren 22an
Ficoba aretoa enpresen eta lan bila ari diren pertsonen arteko topaleku bilakatuko da. Egitasmoa Irungo eta Hondarribiko udalek eta Bidasoa Bizirik-ek antolatzen dute.
Maiatzeko bigarren edizio arrakastatsuaren ostean, bueltan dator Lanean Mugaz Gaindiko Enplegu Azoka. Azokaren helburua da enpresen eta lan bila ari diren pertsonen arteko topaketa erraztea eta lan aukerak sustatzea. Irungo eta Hondarribiko udalek antolatzen dute, Bidasoa Bizirik-ekin batera. Datorrena III.edizioa izango da, eta urriaren 22an egingo dute, Ficoba aretoan, prentsarrekoa azaldu dutenez.
Gipuzkoako, Nafarroako eta Akitania Berriko enpresak bilduko dira. Oraingoz berrogei enpresa baino gehiago daude baieztatuta, tartean, ostalaritza, zerbitzuak eta industria sektoreetakoak. Era berean, azokak berak baliabideak eta lan merkatuari buruzko informazioa emango du. Azokaren bidez, langileek zuzenean jarri ahalko dira harremanetan enpresekin, tarteko bitartekaririk gabe.
“Bidasoaren bi aldeetan dauden aukeren ezagutza hobetu eta lurraldeen arteko lankidetza indartzen jarraitu nahi dugu”, esan du Bidasoa Bizirik-eko presidenteorde Estitxu Urtzibereak. Aktiboki lan bila ari diren profesionalei edota lan aukera berriak nahi dituztenei bideratutako jardunaldia da. Ordutegia zehazteke dago, baina aurreratu dute sarrera librea eta doakoa izango dela.
Bestalde, prentsaurrekoan azokaren bigarren edizioaren datuak eman dituzte. Guztira 51 bertaratu ziren, eta 508 lanpostu hutsetatik 161 lan eskaintza aurkeztu ziren. Lehen ediziotik hazi egin da azoka; izan ere, lehenengoan 48 enpresek hartu zuten parte.
