Lanean Enplegu Azokaren bigarren edizioa, arrakastatsua
Bidasoa Bizirikek antolatutako bigarren enplegu azokan, 51 enpresak 500 lanpostu baino gehiago eskaini dituzte.
Bidasoa Bizirikek Lanean Enplegu Azokaren bigarren edizioa antolatu zuten pasa den ostegunean, hilak 21. Goiz osoan zehar, ehunka pertsona bildu ziren Ficoban, eta denetara, 51 enpresa izan dira lanpostuak eskaintzen. Lanean Gipuzkoa, Nafarroa eta Akitania Berriko enpresen eta lan bila dabiltzan pertsonen topagune bihurtu dira. Iazko datuak hobetu dituzte aurten, eta oso positiboki baloratu dute bigarren edizioa. “Parte-hartze datuek eta enpresek nahiz bertaratutako pertsonek erakutsitako interesak agerian uzten dute benetako beharra dagoela honelako topaguneak sortzeko”, adierazi du Nuria Alzagak, Bidasoa Bizirikeko presidenteak.
Irungo eta Hondarribiko Udalekin elkarlanean, 161 lan eskaintza eta 508 lanpostu huts eskaini dituzte. Ostalaritza, industria, elikadura, merkataritza edo zerbitzuen sektoretako enpresekin elkarrizketak eta harreman zuzenak izan zituzten bertaratutakoek. “Horiek egitasmoaren balio praktikoa azpimarratu dute”.
“Azoka honek enplegagarritasuna sustatzeko eta lan aukera berriak errazteko egiten dugun elkarlana indartzen du, baita lurraldeen arteko lankidetza ere”, nabarmendu du Estitxu Urtizbereak, Bidasoa Bizirikeko presidenteordeak.
Enpresak ere pozik
Azokara bertaratutakoen balorazioaz gain, Lanean parte hartu duten enpresek ere balorazio positiboa ere egin dute goizean zehar eduki duten harreragatik. “Guretzat pribilegioa da egun eta leku berean bilatzen ditugun profilekin bat datozen pertsonak elkarrizketatu eta ezagutzeko aukera izatea. Gainera, gure enpresarentzat oso interesgarriak diren profilak aurkitu ditugu”, azaldu du Martikoko ordezkariak.
Elkarrizketak egiteaz gain, lan-orientazioko zerbitzuak, mugaz gaindiko enpleguari buruzko informazioa, curriculumak inprimatzeko laguntza eta argazkilari profesional baten zerbitzua eskaini ditu. Beti ere, enplegagarritasuna hobetzeko eta herritarrei benetako lan aukerak gerturatzeko xedea izanik.
