Euskara praktikatzeko, eta haren beldurrak kitatzeko
Mintzalagunak taldeak abian dira ikasturte berriarekin. Euskara praktikatzea da xedea, inguru akademikotik kanpo.
Euskara ikasteko grina badute askok, eta hizkuntza berreskuratzekoa beste hainbatek. Hainbat forma daude horretarako. Ohikoena, euskaltegi batean izen ematea, eta ikasiz eta ikasiz, ezagutza handitzea. Baina badaude beste era batzuk, eta haietako bat da Mintzalagunen proiektua. Mintzalagunen bidez, euskaraz hitz egiteko aukera ematen zaio nahi duen orori, talde txikiak sortuz, praktikan jardunez, teoria alde batera utziz.
Pasaden ikasturtean 20 talde izan ziren mintzalagunen proiektuan. Ez dira soilik bildu eta hitz egiteko taldeak. Aniztasun handia dago. Batzuk mendira ibiltzera joaten dira, beste batzuk rol jokoetara jolasten dute, badira ere hikaz aritzekoa, irakurketa errazekoa… aukera asko euskara praktikatzeko. Ingurune akademikotik kanpo geratzen diren praktikaldiak dira, ikastea garrantzitsua delako, baina egunerokoan hizkuntza erabiltzea are gehiago.
Jende berria ezagutzeko eta herri barnean harremanak eraikitzeko aukera paregabea da bestalde. Baina hori ez ezik, aurten, lehen aldiz, mintzapraktikak sarean egiteko aukera zabalduko dute, hitzorduetara hurbildu ezin direnentzat. Euskal Herrian zehar zabaldurik dagoen proiektua da Mintzalagunak, eta beraz, beste herrietako taldeekin ere harremanak sortzea bada haien asmoa.
“Konfiantza irabazteko”
Euskararen inguruko lotsak eta beldurrak kentzeko balio izan die askori mintzapraktikak. Askok, euskara jakin arren, aspalditik ez zuten erabiltzen, eta aukera horren bidez, ezagutza freskatzeko balio izan die. “Norberak jarritako mugak gainditu eta euskaraz aritzeko konfiantza irabazteko gunea da”, adierazi du Hondarribiko Udalak.
Izen ematea zabalik da, bai euskara praktikatu nahi dutenentzat edo haiei lagundu nahi dietenentzat. 688 865 398 telefonoan eman daiteke izena, baina baita ere hemen klik eginda.
