Aldaketak Renferen tren zerbitzuan, beste behin ere
Bihartik, ostirala 25, ostiraletan ez da tren zerbitzurik izango Irun eta Brinkola artean. Hori horrela, astelehenetik ostegunera 04:30eta 17:30 artean ariko dira urriaren 26ra arte. Tren zerbitzua ez dagoen tarteetan, autobusak jarriko ditu Renfek.
Aldaketak egingo ditu Renfek tren zerbitzuan, bihartik —ostirala 25—. Aldaketak, berriro. Horien arabera tren zerbitzua astelehenetik ostegunera eskainiko du 04:30etik 17:30era, eta ostiraletan ez da tren zerbitzurik izango. Hori izango da egoera urriaren 26ra arte. Beste aldaketa bat, Renferen Irun eta Brinkola linearen erabiltzaileek kontuan hartu beharrekoa: urriaren 12an (astelehena) ere ez da tren zerbitzurik izango eta aste horretan, beraz, zerbitzua asteartetik ostegunera emango du Renfek.
Adi erabiltzaileak, bihar ez delako jada tren zerbitzurik izango eta horren ordez, autobusak jarriko ditu Renfek bidaiariak garraiatzeko.
Bihartik aurrera, aldiriko trenak, beraz, astelehenetik ostegunera 04:30etik 17:30era ariko dira Irun eta Brinkola artean. Ordutegi horretatik kanpo, tren eta autobusa konbinatuko dituzte, errepide bidezko trasbordoa eginda Irun eta Hernaniko geltokien artean.
Distantzia erdiko trenen kasuan, errepidez jarraituko dute bidaia egiten Irun eta Andoain artean.
Distantzia luzeko tren zerbitzuen kasuan, Gipuzkoa Madrilekin lotzen dutenek Irun eta Tolosa arteko zatia autobusez egingo dute bi noranzkoetan; Donostia eta Bartzelona lotzen dituztenek Donostia eta Tolosa artean egingo dute trasbordoa. Gainera trenetako batzuk ordutegia doitu dezaketela jakinarazi du Renfek errepide bidezko trasbordoetara egokitzeko. Ordutegiak Renferen webgunean eta bidaiarientzako ohiko komunikazio bideetatik kontsultatu ahalko dira (klik hemen).
