Rainel Ortega boxeolari hondarribiarrak profesionaletan egingo du debuta
'The K.O Machine' ezizenarekin, amateurretan egin du ibilbidea orain arte, hainbat txapelketa eta domina lortuz, hala nola Gipuzkoako eta Madrilgo txapelketak. Larunbatean debutatuko du profesionaletan, Bilboko La Casillan.
Ortega, urdinez, bere borroka batean. Bere ametsaren atzetik dabil Rainel Ortega. Askok diote berandu hasi zela boxeo munduan, baina hasi zenetik, ez da gelditu. Amateur mailetan hainbat borroka irabazi ditu, eta bere ibilbidean lortutako dominek hori bera irudikatzen dute. Bilboko La Casillan izango da konbatea, larunbatean, 19:00etan. Anderson Rangel boxeolariaren aurka debutatuko du Ortegak, eta borrokari begira, konfiantza handiarekin adierazi da.
Ikuskizun polita eskaini nahi die Ortegak bera ikustera hurbilduko diren ikusle guztiei. “Azken finean, boxeoa bada ikuskizuna, eta ikusleak bertaratzean, zerbait polita eta entretenigarria ikusi nahi dute”, azaldu du Ortegak. Boxeo estilo oso gogorra du Ortegak, gogor jotzen du, eta hori bilatuko du larunbat honetan ere. Aurrean, Rangel izango du, Venezuelako boxeolaria. 2019an egin zuen debuta Rangelek, eta harrezkeroztik sei konbate irabazi eta 53 galdu ditu. Ortegak adierazi duenez 75 kilotan adostu dute borrokarako pisua. “Nahiko argi daukat debut hontatik garaile aterako naizela, horretarako lan handia egin baitut azken urteetan”.
Amateur mailan hainbat txapelketa irabazi ditu. Gipuzkoako txapelduna izan da bi aldiz, eta Bizkaian ere urrezkoa irabazi zuen. Enrique Soria txapelketan urrezko eta zilarrezko dominak lortu ditu, eta Madrilgo txapelduna ere izan zen. 40 borroka ditu atzean, baina oraindik kontaketa profesionala 0an dauka. Momentu latzak izan ditu amateur ibilbidean, eta horrek profesionaletarako gogoa eta indarra biltzea eragin du.
Aurrera begira
27 urte ditu Ortegak, eta oraindik badu etorkizuna kirol munduan. Amesteko aukera badu, eta konfiantzarekin begiratzen du aurrera.”Helburuak argi eduki behar ditugu kirol honetan, eta gugan sinistu behar dugu. Espainiako txapelketa irabaztea dut jomugan, eta noski, aurrera begira helburuak handitu beharko nituzke, Europako eta munduko txapelketen bila”, esan du Ortegak. Larunbateko borrokak ezagutzera eramango du boxeolaria, eta hortik etorri daitezke aukera berriak.
Larunbateko boxeo gaualdian hainbat borroka izango dira. Handiena, Jokin Garciarena izango da. Garciak Europako txapelketa defendatuko du La Casillan, Salvi Jimenezen aurka. Hainbat borroka izango dira hortaz gain, hala nola Euskadiko txapelketak edota emakumezko boxeoko pare bat konbate.
