Palmira Dualen gurasoek etxean jarraituko dute
Datorren asteazkenerako, hilak 16, aurreikusitako kaleratzea bertan behera utzi dute eta eskerrak eman dizkiete ondoan izan direnei.
Irundarrek etxegabetzea geldiarazi dute. Atzoko urduritasuna uxatuta, Palmira Dualek lasaiago arnasa hartu du gaur goizean. Atzo, Katea auzo elkartean dozenaka lagun bildu ziren 33 urtez auzoan bizitzen daramaten bizilagunei babesa eta elkartasuna adierazteko. Azken egunotan bolo-bolo izan da gaia irundarren artean, eta gaurkoan, zorioneko berria heldu zaio Dual Jimenez familiari: datorren astearterako, hilak 16, aurreikusitako kaleratzea eten dute, eta bi urtez atzeratzea lortu dute.
Palmira Dualen gurasoak zaurgarritasun egoera aitortuan bizi dira, eta gainera, %75eko desgaitasun fisikoa eta dementzia printzipioak dituzte. Kimbolton Invest SM enpresak, putre funts gisa ezaguna, kaleratu nahi zituen; eta Palmirak atzoko agerraldian argi eta garbi adierazi zuen: ““Zaurgarritasun egoeran dagoen pertsona batentzat 33 urtez egon den etxebizitza bat uztea, bestelako alternatiba egonkorrik eduki gabe, ez da lekualdatze soil bat egitea. Horrek eragin zuzena du maila fisiko zein psikologikoan”.
Itxaropena ez da inoiz galdu behar, eta halaxe egin dute. “Bihotzez eskertu nahi diegu gure ondoan egon diren pertsona guztiak; gure egoerari ahotsa eman diozuenei, prentsaurrekora etorri zaretenei, gure mezua zabaldu duzuenei eta gure familiarekiko zuen elkartasuna erakutsi duzuen guztioi”, eskertu du zabaldutako bideo batean. Justiziaren aldeko borrokan tinko jarraituko dutela kontatu du, “oraingoan erakutsi dugu gure artean lagundutasalbatu gaitezkeela, eta hala jarraituko dugu”.
“Kaleratze honen atzean, pertsona bakoitzak istorio bat du. Guretzat, hau ez da etxebizitza-kontu hutsa izan. Gure gurasoen etxea defendatzea izan da; 33 urtez gure familiak bere bizitza, oroitzapenak eta sustraiak eraiki dituen etxea defendatzea”, adierazi du hunkituta. “Erakutsi diguzue ez gaudela bakarrik! Eskerrik asko beste alde batera ez begiratzeagatik!”, amaitu du.
