Zaurgarritasun egoeran dauden bi pertsona, kaleratze arriskuan
Palmira Dualek bere gurasoek bizi duten egoera ikustarazteko agerraldia egin du; etxegabetzea datorren astearterako aurreikusita dago.
Aurreko astean berri onak baziren ere, gaurkoan bestelako berriak dira Irunen denon ahotan. Kaleratzeak STOP plataformak Irungo familia baten etxegabetze bertan behera gelditu zela adierazi zuen. Gaur, berriz, Katea auzoan etxegabetze arriskuan dagoen familia baten berri eman dute zenbait elkartek: zaurgarritasun egoeran dauden bi bizilagun kaleratze arriskuan daude. Palmira Dualen gurasoek datorren astearterako, hilak 16, dute etxegabetze data aurreikusita goizeko 09:30ean. “Ijituen eskubideen defentsaren aldeko aktibismoagatik ezaguna naizen arren, gaur nire senideen bozeramaile gisa nago hemen”, adierazi du Palmira Dualek.
Kateako auzo elkartean dozenaka lagun bildu dira, eta bertaratutako erakundeei, komunikabideei eta justizia sozialean zein pertsonen duintasunean sinesten duten pertsona guztiei eskerrak eman dizkie Dualek. Palmiraren gurasoek 33 urte daramate Katea auzoan bizitzen, bere jabetzan izandako etxebizitza batean. Urteotan, auzoko bizitzaren parte izan dira. “Nire gurasoak zaurgarritasun egoera aitortuan daude, eta egoera larriagotzen dieten %75eko desgaitasun fisikoa eta dementzia printzipioak dituzte”, azaldu du. Kimbolton Invest SM enpresak, putre funts gisa ezaguna, Palmiraren gurasoak kaleratu nahi ditu.
“Ez dut nahi nire gurasoak denbora mugagabez bertan bizitzea; baizik eta, kaleratzea bertan behera uztea eta denbora izatea haien beharretara egokitzen den etxebizitza duin bat eskuratzea nahi dut”. Azken asteotan buru-belarri dabiltza enpresarekin harremanetan jarri nahian, etxegabetzea bertan behera utz dezan.
Enpresa honek Oviedon (Asturias, Espainia) du egoitza, eta haiekin harremanetan jartzeko burofax bat bidali zion Dual Jimenez familiak. Palmirak desengainua sentitzen du enpresaren partetik jasotako erantzunagatik, asteotan ez baitute erantzun formalik jaso. “Whatsapp bidez jaso genuen erantzuna oso ziztrina izan zen. Diru kopuru txikia eskaini nahi izan ziguten etxeko giltzengatik, ez dute gure egoera benetan zein den ulertzen”. Jasotako mezu horiek abokatu baten eskutan daude, eta abokatu horiek egiazko informazioaren jabe dira. “Ez da normala benetako informazioa edukita ere, kaleratzea bertan behera ez uztea”, azpimarratu du.
Gaur egun, zaurgarritasun egoeran dauden familien kopurua oso handia da, eta horietako asko kaleratze arriskuan daude. Gainera, Dualek agerraldian nabarmendu du horietako askok ez dutela beharrezko laguntzarik eta sare sozialetatik kanpo daude euren egoera azaleratzeko eta zabaltzeko. Bide beretik, zaurgarritasuna kontzeptu konplexua dela dio: “Zaurgarritasunari buruz hitz egiten dugunean, ezin gara dokumentu batera mugatu”. Pertsona horiek irtenbide bat topatzeko baliabideak eta tresnak behar dituzte.
“Zaurgarritasun egoeran dagoen pertsona batentzat 33 urtez egon den etxebizitza bat uztea, bestelako alternatiba egonkorrik eduki gabe, ez da lekualdatze soil bat egitea. Horrek eragin zuzena du maila fisiko zein psikologikoan. Horregatik administrazio publikoari eskatzen diegu beldurrik gabe esku-hartzeko, lohian sartzeko, auzora hurbiltzeko gure egoera tokian tokitik ezagutzeko, zaurgarritasun egoeran bizi diren familien muturreko baldintzekin enpatia izateko”, hunkituta kontatu du.
“Ez dugu onartuko gutaz barre egitea”, salatu du. Kaleratzea bertan behera uzteko itxaropenaz galdetuta, Dualek itxaropena du. “Zaurgarritasun egoeran gaudenok sistema honen akatsetan eta zepoetan murgilduta ikusten dugu geure burua. Irtenbidea lortu arte borrokan jarraituko dugu, eta ez dugu etsiko irailaren 16ra arte nire gurasoek etxebizitzan jarraitu arte”, amaitu du.
