Mugikortasun jasangarria sustatzeko programazioa aurkeztu dute
Mugikortasunaren Europako Astearen baitan, autorik gabeko hamarnaka jarduera antolatuko dituzte hilaren 17tik 21era bitarte.
Gaur egun, Irungo kaleak ibilgailuz beteta daude. Horietako askok ibilgailu pribatuak dira, eta egunero harat honat ibiltzen dira hiriko errepideetatik barrena. Datorren astean, Mugikortasunaren Europako Astearen baitan, garraio jasangarria sustatzeko eta autorik gabeko mundua irudikatzeko hamarnaka jarduera antolatuko dituzte. Hilaren 17tik 21ra bitarte, garraio publikoak, eta batez ere, bizikletek hiriko kaleak hartuko dituzte. Jarduera hauen bitartez, herritarrak mugikortasun jasangarriak duen onurez sentsibilizatzea eta kontzientziatzea nahi dute.
“Udalean, zinez sinesten dugu mugikortasun jasangarrian. Gure apustua irmoa da, eta lan egiten ari gara Irun hiri jasangarria izan dadin, ingurumenarekiko adeitsua”, adierazi du Sergio Javier Mugikortasun Jasangarriko ordezkariak. Iñigo Berges Herritarren Bizikidetzarako ordezkariak ere Javierrekin bat egin du: “Horrexegatik, mugikortasunaren funtsa ez da soilik nola mugitzen garen: errespetuan, erantzukizunean eta bizikidetzan ere datza”.
Aurten, gainera, hainbat proiektu martxan jarriko dituzte. Alde batetik, BIZIminutua estreinatuko dute. Hiriaren mapa bat eskainiko dute, hirian dauden distantzien denborak kalkulatzen dituena bizikletaz joateko. Proiektu honen gaineko informazio xehetua eta mapak datozen asteetan banatuko dituzte hiriko hainbat puntutan. Bestalde, Elatzeta eta Eguzkitzako ikastetxeen inguruko trafikoa baretzen duen Muxu eta Agur sistema urte osora zabalduko dute. Honela, maniobra arriskutsuak murriztu eta eskola ingurune seguruagoa lortuko dute.
Balazta, Nagusilan eta Plaiundirekin elkarlanean, Nagusikletaren edizio berria martxan jarriko dute. Mugikortasun murriztua dutenentzako eta bakardadeari aurre egiten laguntzeko programa da. Trizikloak erabiliko dituzte hirian barrena ibilbideak egiteko.
Hilaren 20an, bizikleta martxa herrikoia
Ostegunetik larunbata bitarte, bizikletan ikasteko tailerrak eta hainbat ikuskizun eskainiko dituzte hainbat puntutan. Igande goizerako egitasmo ugari antolatu dituzte kontuan hartuta Kolon pasealekua, igandero bezala, trafikoarentzako itxita egongo dela. Jolasak, tailerrak, bigarren eskuko bizikleten azoka Zabaltza plazan, eta bizikleta martxa herrikoia egingo dituzte. Tailerretan parte hartzeko izena eman beharko dute udal webgunean.
11:30ean Zabaltza plazatik hasita, Plaiaundirainoko bizikleta martxa herrikoia egingo dute aurten ere. Plaiaundira heltzean haur zein gurasoek hamaiketakoa izango dute, bueltako biderako indarra izateko. Jende askok parte hartu izan du aurreko edizioetan, eta aurten ere kaleak bizikletaz betetzea espero dute.
Programazioa Autorik gabeko Munduko Egunarekin amaituko da. Hilaren 21ean, astelehenarekin, Kolon pasealekua igandeetan bezala trafikorako moztuta egongo da, 10:00etatik 19:00etara. Gipuzkoa hiribidearen eta Francisco de Gainza karrikaren arteko tartean bizikletak eta trizikloak erabiltzeko aukera izango dute. Arratsaldean, 16:00etatik aurrera, bizikletan modu seguruan ibiltzeko tailerra egingo dute Ibarlako Bide Heziketako zentroan.
