Irun Baik etapa berriaren nondik norakoak azaldu ditu
Uztailean sortutako alderdi politiko berriak udal hauteskundetarako "oso ongi altuko hiria" lortzeko eginbeharrak aurkeztu ditu.
Uztailean Irunen alderdi politiko berria erregistratu zen: Irun Bai. Aurkezpenean, herritarrentzako alternatiba hurbil, ireki eta erabilgarria izango zela azaldu zuten: “Aspalditik lantzen ari den udal proiektua da”. Hiriaren beharrak erdigunean jarriko dituztela zin egin zuten, eta gaurkoan, eginbehar horiek azaldu dituzte. “Ez dugu nahi Irun gainditze hutsarekin konformatzea. Gutxienez, oso ongi altuko hiria nahi dugu: hemen bizi direnen benetako beharrei eta lehentasunei erantzungo dien hiria”, adierazi dute.
Herenegun, hilak 9, etapa berri bat hasiera eman zioten alderdiaren filosofia laburbiltzen duen mezuarekin: “Irun ere eskolara itzuli da. Eta oraindik etxeko lan asko ditu egiteko”. Horretarako, arazoak identifikatzea, horiek pairatzen dituztenei erantzun bat ematea eta konponbide zehatzak mahai gainean jartzea helburu izango dutela nabarmendu dute, “ez dugu politika bulego batetik egin nahi”. Ideia sinplea dute: “Entzun. Aztertu. Proposatu. Azaldu. Bete”.
Hauek dira Irun Baik proposatutako egin beharreko etxeko lanak, hitzez hitz:
1. Segurtasuna eta bizikidetza. Lasaitasuna berreskuratzea eta bizikidetza eta segurtasuna eskutik joango diren hiri baten alde lan egitea.
2. Mugikortasuna: trafikoa eta aparkalekua. Bizilagunen, langileen eta merkataritzaren eguneroko bizimoduan eragina duen arazo nagusietako bati heltzea.
3. Auzoak eta parte-hartzea. Irun ez dadila erdigunean amaitu. Auzoei entzutea eta parte hartzeak erabakietan benetan eragiteko balio dezala lortzea.
4. Tokiko ekonomia. Merkataritza txikia eta jarduera ekonomikoa defendatzea, kale biziak eta aukerak izango dituen hiri baten alde eginez.
5. Etxebizitza. Gazteen eta familien arazo nagusietako baten aurrean udal mailako konponbide errealistak bilatzea.
6. Benetako kontziliazio politikak. Kontziliazioaz hitz egitetik harago joatea, eta familiek benetan nola bizi eta antolatzen diren kontuan hartuko duten neurriak sustatzea.
