Irun Bai alderdi politikoa erregistratu dute, "herritarrentzako alternatiba hurbil, ireki eta erabilgarria"
"Aspalditik lantzen ari den udal proiektua" dela adierazi dute alderdiaren sustatzaileek. Egitura sortzen ari dira.
Irunek alderdi politiko berri bat du, Irun Bai. Alderdiaren sustatzaileek jakinarazi dute jada Alderdi Politikoen Erregistroan formalki inskribatu dutela, “Irungo oraina eta etorkizuna ardatz dituen udal izaera duen alderdi berri gisa”. Aurrerago emango dituzte euren lerro ideologikoen gaineko xehetasunak baina azaldu dute “herritarrentzako alternatiba hurbil, ireki eta erabilgarria” izango dela: “Irun Bai ez da bat-bateko iniziatiba bat, ezta erakunde baten kontrako erantzuna ere. Aspalditik lantzen ari den udal proiektua da”. Hiriaren benetako beharrak erdigunean jarriko dituztela zehaztu dute.
Irun Bairen buruek azaldu dute hiriko hainbat gizarte, auzo eta lanbidetan dabiltzan pertsonen arteko elkarrizketa eta lan partekatu prozesu batetik sortu dutela alderdia.
Behin erregistratuta, barne egitura sortzeko lanean direla adierazi dute, prentsa ohar bidez, alderdiaren sustatzaileek. Lantaldea handitzeko zereginean ari dira, eta herritarren parte hartzerako espazioak zabalduko dituztela adierazi dute “programa politiko serio, errealista eta hiriaren lehentasunekin konektatua dena eraiki ahal izateko”. Datozen asteetan emango dute haien printzipioen, lan taldearen eta udal proposamenen berri. “Ordura arte alderdiak erantzukizunez, diskrezioz eta batzeko bokazioarekin lan egiten jarraituko du”.
Oraingoz, ez dute adierazi 2027ko maiatzean egitekoak diren udal hauteskundeetarako zerrenda aurkeztuko dutenik. Bidalitako prentsa oharrean esandakoek iradokitzen dute, ordea, hautagaitza izango dutela. “Irun Bai ez da inoren aurka egiteko jaio. Irunerako jaio da”, esan dute.
