Udalak "ez du asmorik" Damarri kaleko etxea botatzeko
Bizilagunen kexak eta alderdi politikoen arteko tentsioak gorabehera, Hondarribiko Udalak azaldu du etxebizitza botatzearen asmoa Jaurlaritzak mende hasieran onartutako bi dekretuetan oinarritzen dela. Udalak ez du dekretuen gaineko eskumenik, eta gehitu du "bizilagunekin bat egiten" duela.
Udalak esan du ez daudela bere esku Jaurlaritzaren dekretuak.Hondarribiko Udala Azken egunetan tentsioa eragin du Hondarribian Damarri kale inguruko etxebizitzen auziak. Bizilagunak kexu agertu dira etxea bota nahi dutela salatuta, eta albisteak hautsak harrotu ditu herriko alderdi politikoen artean. Bada, Hondarribiko Udalak prentsa oharrez adierazi du ez duela “etxebizitza bakar bat bera ere eraisteko asmorik”.
Udalak azaldu duenez, auziaren sorburua ez dago 2023an onartutako HAPO Hiri Antolamendurako Plan Orokorraren barruan, orain arte zabaldu bezala, baizik eta Eusko Jaurlaritzako Ondare Sailaren 2000ko eta 2001eko dekretuetan. Orduko hartan onartu ziren bi dekretuek aurreikusten dute harresiaren inguruko hainbat eraikin desagerraraztea, tartean Damarri kalearen ingurukoak.
Bi dekretuak udal plangintzaren gainetik daude, hortaz, udalak “legez eta administrazio prozeduraren baitan” jaso behar ditu HAPOan. Dena den, udalak zehaztu du dekretuak jaso bai, baina ez duela bat egiten eskatzen denarekin, hau da, etxebizitza eraistea. “HAPOan jasotakoa indarrean dagoen araudiaren eta Eusko Jaurlaritzaren txosten loteslearen ondorio da, ez Udalaren borondate politikoaren ondorio”, esan du Igor Enparan alkateak.
Etxebizitzarekin duen konpromisoa adierazteko, udalak gaineratu du ingurua auzobihotz izendatu duela “eremuaren balioa” aitortzeko, eta inguruko etxebizitza bat ere erosi duela herriko etxebizitza parke publikoan txertatzeko.”Ez luke zentzurik Udalak etxebizitza bat erostea herriko etxebizitza parke publikoan sartzeko eta, aldi berean, hura eraisteko borondatea izatea”, esan du alkateak.
Era berean, udalak San Nikolas Baluartea erosi du, “harresia eta haren ingurua berreskuratu eta balioan jartzeko” asmoarekin. Helburua, udalak dioenez, herriko “ondare historikoa leheneratzea eta herritarren eskura jartzea” da, horretarako “inguruko etxebizitzarik eraitsi beharrik gabe”.
