Damarri kaleko bizilagunek salatu dute zenbait etxebizitza "eraitsi" nahi dituztela
2023an onartutako Hiri Antolamenduko Plan Orokorrarekin dago lotuta auzia, zehazki, planaren gaineko Jaurlaritzaren bi dekretuekin. EAJk salatu du "ez zela "horrelakorik onartu" bere momentuan. Abotsanitzetik, berriz, esan du dekretuak "udalaren eskumenaren gainetik" daudela.
Bizilagunek aldarrikatu dute ez eraisteko etxebizitza.Abotsanitz “Etxe hau ez bota”. Hala irakurri daiteke Hondarribiko Damarri 3 etxebizitzako balkoietan. Bizilagunek salatu dute etxebizitza eta bere inguruko beste hainbat husteko eta eraisteko arriskuan daudela. Bizilagunen haserreak tentsioa eragin du EAJren eta Abotsanitz alderdien artean.
Etxebizitza krisiaren testuinguruan, 2023an Hondarribiko Udalak HAPO Hiri Antolamenduko Plan Orokorra onartu zuen, 1. 500 etxebizitza berri eraikitzeko. Planean, Eusko Jaurlaritzako Kultura Sailaren 2000. eta 2001. urteko bi dekretu zehaztu gehitu ziren, zeintzuek udalari ematen dioten ahalmena harresiaren inguruan etxebizitzak eraisteko, beharrezkoa izanez gero.
Bizilagunak kexu agertu dira, Jaurlaritzako Kultura Sailaren txosten batean oinarritua, etxebizitzak “desagerrarazi” nahi dituztelako, “bat ez datozen elementuak” kontsideratzen direlako. Defendatu dute auzoaren XI. mendeko mapa batean “argi” ikusten dela etxebizitzak ez daudela harresiaren gainean. Sinadura bilketa abiatu dute, eskuz zein digitalki, etxebizitza eraistearen aurka.
Alderdiak kontrajarrita
Egoeraren aurrean, EAJk ohar bidez salatu du 2023an plana onartu zutenean “ez zirela jakitun” etorkizunean etxebizitza haiek “desagerrarazteko asmoa” egongo zitekeenik. Jeltzaleek aldarrikatu dute etxebizitza horiek babestu egin behar direla, argudiatuta memoria leku izendatuta daudela.
Bestalde, Abotsanitzek azaldu du Jaurlaritzak ezarritako bi dekretuak Plan Orokorraren gainetik daudela, eta hortaz, udalak “ez duela eskumenik” dekretu horiek esaten dutenaren aurka egiteko, bestela Plan Orokorra deuseztatzeko “arriskua” egongo litzakeelako.
Alderdiak adierazi duenez, udal ordezkaritza “esfortzu handiak” egiten ari da eraikinen egoera lantzeko, baina, dioenez, Jaurlaritzaren dekretuak “betebeharrezkoak” dira. Dena den, bizilagunen aldarriarekin bat agertu da, esanez ez dutela nahi “inolaz ere” Damarri 3ko etxebizitza eraisterik, eta defendatu du herritarrek “herrian bertan” bizitzeko eskubidea dutela.
