Uda agurtzeko, Green Valley taldearen kontzertua
UdaTXAO! musika jaialdiaren hirugarren edizioa antolatuko dute hilaren 19an, Sarjia parkean eta Urdanibia plazan; kontzertua 21:00etan hasiko da.
Uda amaitzear da, eta sasoi onean eta erritmo lasaian amaitzeko UdaTXAO! musika jaialdia antolatuko dute, hirugarrenez. Sarjia parkean eta Urdanibia plazan hainbat jarduera antolatuko dituzte hilare 19an, larunbatarekin, arratsalde-gau partean. Gazteen talentua eta aisialdi kulturala uztartuko ditu jaialdiak, eta horren baitan, sormen tailerrak, dantza eta gastronomia eskainiko dira. Nestor Gomezek etaa Patricia Ardanuyk raclette dastaketa egingo dute, La Visionariaren eskutik. Arratsaldeko hitzordurik nagusia Green Valley taldearen kontzertua izango da, 21:00etatik aurrera.
18:00etan hasiko dira sormen tailerrak Sarjia parkean. 20:30ak bitarte, zeramika, bitxi eta joskintza tailerrak antolatuko dituzte, baita totebag-ak estanpatzeko tailerra ere, 18:30ean hasita. Tailer guztiak Irungo artisauen eskutik izango dira: Ka. Ceramica, Kokora Handmade, Mimoxa jantziak. Poltsen tailerrean, berriz, Olaia Martinez eta Maialen Arozena marrazkilariak ariko dira serigrafia tailerra dinamizatzen. Parte hartzeko izena eman beharko dute uda webgunearen bitartez, plazak mugatuak dira eta. Tailerrak egin bitartean, Irune eta Unai Muguruza DJek Sarjia parkea girotuko dute.
Arratsaldea borobiltzeko Green Valley talde euskal-katalanak Urdanibia plaza reggae erritmoz beteko du. Aurten kaleratu duten azken lana, El Arte de Vivir, abesti ikonikoekin nahastuko dute kontzertua borobila emateko asmoz.
Ordu berean, 21:00etan, Sarjia parkean Inguma dantza taldeak Fluxus ikuskizuna aurkeztuko du. Hogei minutuko iraupena duen antzezlana izango da, eta euskal kulturaren eta dantza garaikidearen balioa nabarmenduko dute.
Bestalde, arratsaldean zehar GazteARTEanen informazio gunea jarriko dute ospitale zaharraren parean. Bertan, aurtengo jaialdiaren informazioa jasotzeaz gain, datozen urteetarako gazteen proposamenak bilduko dituzte.
