Marlaxka Xake Klubaren webguneak milioi bat bisita jaso ditu sortu zutenetik hona
2011n sortu zuten, eta xake partiden emaitzak, argazkiak zen kronikak aurki daitezke bertan, bai euskaraz bai gaztelaniaz.
Emakumeen IX. Xake Ttopara, martxoan. Harro eta pozik jakinarazi du albistea klubak: 2011n webgunea sortu zutenetik gaurdaino, milioi bat bisita jaso ditu. Xakearen mundua eta inguruan biltzen den guztia biltzeko eta jasotzeko asmoz sortu zuten webgunea, eta egun, askotariko informazioa topa daiteke: klubaren historia eta ibilbidea, txapelketen emaitzak, kronikak edota argazkiak, besteak beste.
Gainera, elebiduna da, eduki erdia euskaraz baitago, eta bestea gaztelaniaz. Edukiak euskaraz argitaratzearekin “konprometitua” dago kluba, esan duenez: “Euskara ez baita guretzat komunikatzeko tresna hutsa. Gure herriaren, gure kulturaren eta gure klubaren izaeraren parte da”. Ildo horretatik, jasotako bisiten datu zehatzak ere partekatu ditu klubak: 870.847 bisita gaztelaniazko edukietara izan dira, eta 131.327 euskarazkoetara.
Klubak aitortu duenez, pasa den igandean, hilak 30, antolatutako Gazteluko XIV. Xake Txapelketaren inguruko bilaketei esker iritsi dira bilaketa kopuru horretara. “Partida ez da azken mugimenduarekin amaitzen, gero kronikak, argazkiak eta bizipenak daude”, esan du xake taldeak.
Historikoa da lortutako langa klubarentzat, eta hortaz, eskerrak eman dizkie orain arte bidean izandako jokalari, xake zale, entrenatzaile zein antolatzaileei.
