50 xakelari aritu dira Hondarribiko Gazteluko XIV. Xake Txapelketan
Aurtengoa, Silvestre Moreiro Sanchez bigarren memoriala izan da; Gros XT taldeko Dani Odriozola Coscolin nagusitu da.
Atzo, hilak 30, Hondarribiko Paradorea xakearen topagunea izan zen. Bertan, Hondarribiko Gazteluko XIV. Xake Txapelketa jokatu zuten Euskal Herriko 50 xakelarik. Gainera, aurtengoa Silvestre Moreiro Sanchezen omenezko bigarren memoriala izan da. Egun luzea izan da, eta goizean zehar une hunkigarriak bizi dituzte Paradorean bildutako xakelariek eta antolatzaileek. Parte hartzaileen artean onena Gros XT taldeko Dani Odriozola Coscolin izan da, 5,5 puntu lortuta. Podiumean berarekin batera, Asier Etayo Delgado eta Javier Dominguez Ofretorio izan dira, hurrenez hurren, bigarren eta hirugarren.
Mariano Otero Bonis oso presente eduki dute aurtengo txapelketan. Marlaxka xake klubeko kide eta zuzendaritza batzordeko presidenteorde izan da urte askoan; uztailaren 25ean zendu zen. Gipuzkoako xakelari beteranoetako bat izan da, eta azken unera arte xakearekin harreman estua izan du. Txapelketa hasi aurretik, minutu bateko isillunea egin zuten haren omenez.
10:00etan hasiera eman zioten partidei, eta 14:30ak bitarte tentsioa bizi izan zen aretoan. Txapelketak sei txanda izan ditu, 15 minutu eta jokaldi bakoitzeko 3 segundoko gehikuntza erritmoan eta sistema suitzarraren bidez. Lehia estua izan dute parte hartzaileek eta partidak amaitzean, sari banaketa eta bazkari-merienda bat antolatu zuten Klink elkartean. Beste urte batez, kirola, lehiaketa eta laguntasuna uztartu dituzte.
